曾表示有意加入娛樂圈，對於做模特兒或主持都有興趣嘅特首梁振英女兒梁齊昕，被一間電影公司睇中拍戲，並言之鑿鑿邀請佢擔正做女主角，而李逸朗就做男主角。
該戲監製及導演劉俊輝（曾是《同根生》製片），接受本報電話訪問時，被問到今日係咪有個電影傳媒採訪邀請？佢話係，而今日傳媒亦收到邀請通告，並於傍晚六點半喺沙田有個記者招待會，被問到通告中所指嘅梁齊昕，係咪特首女兒？劉俊輝表示係。
咁新戲戲名叫乜嘢？佢話戲名暫時要保密，又話開鏡先講，過咗年就會開鏡。問到係咪會有特首個女梁齊昕拍？劉表示：「係，0依家唔方便講。」
再追問6點半嘅記者會，梁齊昕係唔係都會嚟？佢話：「應該會啩﹗」
咁結果梁齊昕有冇出現記者會呢？答案係.....冇嘅﹗事關導演劉俊輝喺新戲記者會表示，齊昕因為唔舒服，就連行路都有問題，所以上咗車都要車返轉頭。
不過劉導演堅稱齊昕已經簽咗約，又話佢片酬高達六位數字，並表示電影於3月8日開鏡。
http://hk.apple.nextmedia.com/enews/realtime/20150210/53423284
特首梁振英女兒梁齊昕殺入影圈，接拍劉俊輝監製及導演新戲，戲名傳係叫《男極探射燈》，將於今日傍晚喺沙田舉行記者會。
而齊昕於呢部戲將與另一新聞人物李逸朗演情侶，據悉齊昕於戲中演一名愛心社工，有傳該片還有大膽床戲，而貴為影壇新人嘅齊昕，片酬達6位數字。
有傳陳惠敏將會喺戲中演齊昕老竇，本報致電陳惠敏，佢反問：「係唔係真呀？」問到期唔期待同CY女合作，佢話：「咁佢都靚女，都有睇頭。」
讚有義氣有諗法
導演爆齊昕 新戲着比堅尼
特首梁振英女兒梁齊昕將夥拍另一新聞人物李逸朗，拍攝由劉俊輝監製及導演嘅新戲，除咗佢兩個外，採訪通告上仲有陳惠敏､曹查理､Eddie@EO2及樓南光等等。
劉俊輝接受本報電話訪問時表示，與梁齊昕見過幾次面，食過幾次飯，傾過好長嘅偈，佢話：「今次搵梁齊昕拍戲，係機緣巧合，喺一個場合撞到佢，覺得佢有拍戲天份，傾傾下先知道佢係特首個女，個人好有義氣。」
講到齊昕好似好反叛？佢話：「喺家庭壓迫下，細路女會反叛，有乜奇呀？慢慢教。」
咁今次拍戲有冇問佢Daddy梁振英同意？劉俊輝話：「我唔係搵佢爹哋拍戲，佢個女已經係成年人，會識交代處理，唔使我去操心。」
問到新戲中會否有大膽床戲？佢話：「唔係，佢喺戲中着比堅尼，冇乜三級暴露鏡頭。床上戲只係佢喺床上食嘢，冇乜嘢，戲中角色好正面，唔係反派。」
劉俊輝續說：「呢個女仔好有諗法，如果有興趣，畀佢試下，未正式開工，過幾日先會開。（搵特首女兒拍戲有壓力？）有乜壓力？都係搵個後生女。」
劉俊輝曾是電影《同根生》製片，而《同》出品人及監製則是袁金倫。劉俊輝擅拍江湖人物電影，以及三級電影，
包括監製過《四度誘惑》､《人頭豆腐湯》､《旺角的天空3之終極邊緣》､《赤裸紅唇》､《新三狼之歡場屠夫》､《古惑仔之出位》，劉俊輝佢亦擔任過《根太軟》､《護花情迷》導演。
