冬季轉會市場結束，車路士並冇買人，唔少傳媒認為係老細阿布同領隊莫連奴不和，所以先閂水喉，呢個係咪事實真係好難講，但係Peter就有另一種睇法，阿布當初入主車路士，全心想捧英超冠軍，如今心願達成，難免逐漸失去當初嗰份熱誠。
Peter見過唔少有錢老細達成預計目標，跟住就開始放軟手腳，俗語有云：「家花不及野花香」，當完全擁有一樣嘢後，自然冇晒新鮮感，好容易會貪新忘舊。阿布依家好有可能存在呢種心態，唔肯再花錢買人絕對可以理解。
維拉富咸曼城韋根和波過關
踏入新年以後，英超前列分子班球員明白唔可以再失分，現階段每場都係認真作戰，戰意非常鮮明，所以近排賽果比較正路。今晚有九場英超，當中唔少中游分子對決，賽事形勢接近，出現連場和波情況絕不為奇。
今晚Peter睇中四場和波，想玩刀仔鋸大樹，中埋可以辦定年貨。阿士東維拉近況麻麻，主場對住連番添兵嘅韋斯咸冇優勢，和味好濃。同晚富咸主場對紐卡素，兩軍戰鬥力接近，打成平手機會甚高。曼城今季攻力麻麻，主場對近況大勇嘅雷丁難贏，博和好過。最後推介韋根和，呢隊波聯賽八連敗，面對態況回落嘅樸茨茅夫有望搶番一分。
