先睇賽程：
Arsenal V Stoke
Cardiff V Tottenham
Chelsea V Fulham
Crystal Palace V Swansea
Liverpool V Southampton
Man City V Man Utd
Newcastle V Hull
Norwich V Aston Villa
West Brom V Sunderland
West Ham V Everton
照表面賽程睇，今周車路士、阿仙奴、利物浦、紐卡素都係主場出擊，對手都係比較弱既隊伍，應該睇高 1 線 ！其中攻擊球員方面，我會特別著重係阿仙奴、利物浦同紐卡素三隊。
阿仙奴新近加盟既奧斯爾，首場盡顯功架！一黎到已經證實自己有係英超爭勝既實力。如果唔係高仙尼場場派膠，將大好形勢一手摧毀，上場阿仙奴唔應該打得咁辛苦。進攻球員應該可以得到更多分數。今周改為主場，對手史篤城攻力疲弱，防守亦比去年遜色不少。可以完勝。能否大炒，就要睇各敗家仔既表現了。上場另一罪人禾榷特，在形勢大好下屢屢失機，多次錯失將比數拉開既機會。佢自己拎番黎既分數亦乏善足陣。回報率連五成都無。買左真係喊三聲。但無可否認，佢既機會真係多。奧斯爾既致命傳送，的確需要禾仔呢類跑狗型既球員配合。多次失機既反面就係多次獲得機會。機會多，總係有利。如果幸運之神肯睇睇佢，話唔定戴帽都未定。賭得大羸得大既前題下，搵佢做隊長都唔係無得諗。奧斯爾當然要買，不過，好難期望佢會大爆特爆。安安全全執十零分已經好滿足。佢唔係隊長既最佳人選。另外，相信周六已經唔少人係基奧特入波之後偷左佢。狀態大勇既佢係今周必買球員之一。禾仔、奧斯爾、基奧特係今周進攻鐵三角。當然，上場入左兩球既藍斯，相信亦有唔少人偷左。不過略欠穩定性，暫時唔係太睇得透。今周又太多選擇，唔想all in 一隊。揀左以上鐵三角既，可能要放棄佢了。但如果你想爬冷突圍，未尚唔可以考慮。
另一隊重注球隊，一定係利物浦了。頭三場三戰全勝，今晚戰績如何未知，但比人有脫胎換骨既感覺。進攻球員表現對板！其中唔駛問，場場有波入既史杜列治必定係今周三個前鋒既選擇之一！之前長買史毒既，相信已經賺到少。佢同基奧特都係季初最有態既前鋒之一。最重要既係，佢同基奧特一樣，係球隊既進攻核心。幾乎有波都會造比佢！曼聯vps 都會比朗尼分薄d 分；曼城阿古路亦有幾個前鋒同佢爭入波。但利記阿仙奴一樣，單天保至尊，所以要買前鋒，一定要買呢類。修咸頓近況雖然唔係差，但作客情況下，可能只能穩守。今季利記對住穩守既球隊，應該無好似上幾季咁，老鼠拉龜。相反，圍剿之下，更易得分。今周史毒、古天奴，都會係心水之選。咁謝拉特呢？謝拉特宜家角色有變。上次對曼聯，我反而買佢，但對較弱球隊，我會選古天奴。因為隊長鐘意墮後較炮，比班年青球員衝鋒陷陣，自己扼守中路。係形勢大好既情況下，佢反而無咩表演機會。都係駁駁腳咁。最能得分既tw、pi、fw可能會因此而減少。所以並唔係心水選擇。aspas 唔係唔好，但情況同藍斯一樣，只會係次選，係太多選擇既情況下，好難會用到佢。
不得不提，改打433既紐卡素令人眼前一亮。尤其係YFF 呢方面。賓艾化已經連續兩場爆分！我由對佢無咩信心到宜家充滿信心。兩周幫我拎埋43分，高過哂咩VPS 、阿古路、迪高斯！最重要既係，佢放中場位，有利舒緩前鋒位不足既問題。下周主場對候城，雖然未至於係一面倒既局面，相信接近今場對維拉，互有攻守下，繼續密密執分！另一前鋒雷米，亦站穩正選之位。由於賓艾化連續入波，對手應該都會特別注意佢，或者有利雷米爆出。身鋒只係八個幾。如果你之前無偷定賓艾化，宜家又有個前鋒位空左出黎無著落，不妨諗諗佢。
其實主場對弱隊方面，最有利個隊並唔係以上三隊，而係車路士。對手只係富咸，我幾乎可以想象到黎緊會係一場大屠殺。尤其車仔上場無端端失左三分，摩頭吃下今季英超首仗敗仗，一定烈怒攻心！今場唔殺對手一個片甲不留一定唔罷休。既然係咁，點解將佢放係咁低既位置，而唔係首選呢？明顯係因為，車仔實在太多人了。你都唔知會爆邊個出黎。先講前鋒，伊度奧寶刀未丈，威脅力仍然嚇人！本來係首選，如果佢個正選位置得以確定的話。問題係，我怕佢打打下又被人換出黎，尤其係領先既情況下，所以，比起基奧特、史杜列治等，多左一重隱憂。夏薩特放左係前鋒位亦令人卻步。托利斯就更加唔駛講了。講到明有正選你都未必敢買佢。中場方面人多到爆，相信奧斯卡會係正選較穩既一個。問題係，珠玉在前。有奧斯爾、有禾仔、有古天奴、有賓艾化、仲有未介紹到既熱刺一大班中場………佢排到街尾咁滯………似乎未必係今周大熱了。
[ 此帖被freezefox在2013-09-17 11:15重新編輯 ]
