睇左幾日波，唔知大家「狀態」如何啦。我就睇左頭兩晚已經病病地了。拿拿臨執兩服藥返黎止止咳先。病完又再睇過。宜家呢個時候，只能揀波睇，不能場場睇了。否則，恐怕捱唔到去八強就已經一命烏乎（尋日有新聞話有人睇波睇到瘁死係電腦前面…………）。大家睇波還睇波，保重身體呀。
尋晚三場波，只揀左阿根廷個場黎睇，但睇黎揀錯了。呢場係我睇左咁多場之中最悶個場。下半場我直頭睇到訓著。真係有少少失望。比起西班牙對荷蘭個場固然一天一地。就算比起英格蘭對意大利都一樣失色不少。可能波斯尼亞仲未可以迫到阿根廷全力出擊吧。感覺上佢地仲係留有一手的。即係話，要睇阿根廷既真正實力，分分鐘要等到16強，甚至8強，對到D 勁旅，先有機會一窺其實力了。
打到宜家，傳統勁旅差唔到都出哂場咁滯。係剩番今晚最後呢兩隊了。德國對葡萄牙！12點直播，絕對係今晚既重頭戲。非睇不可呀。德國上屆世界杯已經予人耳目一新既感覺。新一批年青國家隊成員已經完全接棒，靜待葡萄成熟時。該年，四強準決賽中輸比如日方中既西班牙，飲仇出局，無話可說（當年我係德國睇呢場波，第二朝同客人開會，全場死狗咁款，真係揀錯日子黎開會………）。上屆歐國杯諗住決賽都係西班牙對德國，點知意外地係準決賽落敗於意大利！無緣再對西班牙一雪前恥！但未影響坊間對德國隊既評價。德國既實力未必係世界第一，但講穩定性，肯定係NO.1 了！近三十年，德國隊係世界杯既成績可以話係傲視同群。一屆冠軍，三屆亞軍，兩屆季軍。屆屆都有貨交。今屆係G 組，小組中最強對手都只不過係葡萄牙。其他美國同加納根本不能同德國相比。H 組對手亦只有比利時、俄羅斯等二線球隊。無論係首名次名出線，德國打入16強，甚至8強既呼聲極高。今年大家又估下佢可以走到幾遠？
相比德國，葡萄牙就顯得遜色得多了。國際賽成績根本無得同德國比。尤其係世界杯，近三十年先得06個一屆可以殺入四強。似乎都係陪跑份子多。而且葡萄牙最強實力者朗拿度傷勢又唔知點。首場上陣成疑。絕對係國家隊最大既危險。今晚呢場波，相信坊間普遍都係睇高德國1 線。當然，最老套個句：波係圓既。當荷蘭可以大數西班牙5:1 時，有咩係唔可能發生的呢？
舊規舉：估正選名單。估中德國或葡萄牙正選陣容者，可以獨得或平分各一萬蚊好友元。注意，係「或」，唔係「及」。唔駛中哂兩隊。一隊一萬。截止時間，今晚十點鐘！過時唔計。
再黎過三關：
1. 誰勝誰負定係和波？
2. 致勝入球出現係上半波定係下半場，定係無致勝入球？
3. 入球數字大過3 定細過3 定係岩岩好3 球？
截止時間= 開波時間！
[ 此帖被freezefox在2014-06-16 12:25重新編輯 ]
