[日本]北海道拼命之旅 [復制鏈接]

隨心而發決定要去北海道旅行，後來因為一d原因未正式訂機票酒店，到真係買時CX嘅直航機票由原來嘅6千幾變左做7千幾，唯有退而求其次轉機，為左有多d時間係北海道，仲要揀左最唔鍾意嘅凌晨機，經首爾去札幌，咁樣轉一轉慳番成3千蚊，所以唔鍾意都要搭
凌晨機嘅關係，未出發先辛苦，夜晚8點先勉強放到工﹙其實d野未做野，不過由佢﹚，趕返屋企食飯沖涼攞行李，9點半趕住出去，我甚至趕到以為自己係去著草，上到機場巴士先叫做可以放鬆下
係飛機上如常地訓唔到﹙that’s why最唔鍾意凌晨機﹚，去到仁川機場要等4個幾鐘，專登帶左本書去睇，搞左半日終於去到新千歲機場，到步時間同CX一樣﹙不過人地唔係凌晨機lor﹚

第1日去小樽，住係JR站對面嘅Dormy Inn Premium，特式係有免費宵夜，同埋早餐好豐富﹙早餐要錢嘅，1,500日元，絕對物有所值﹚，而且有溫泉浸。小樽其實可以即日來回，不過諗住小樽運河黃昏影唔到magic
hour可以清晨補飛，所以就stay一晚，反正成個trip不停搬酒店，都唔差在多一次

去到小樽大概3點，去酒店放低行李洗個面就出去，主要都係遊覽小樽運河一帶。天氣方面就天陰不過唔凍，有3-4度，積雪多，唔錯。北方冬天日照時間特別短，所以好快就開始天黑，陰天當然無晚霞，不過個天藍得幾靚，d相都影得唔錯，即時決定聽朝可以訓耐d

到個天黑齊就食晚飯，係運河旁邊食燒海鮮，每檯有個炭爐自己燒，又玩又食都幾過引，自己食完之後件褸都食得好飽燒烤味


由酒店去小樽運河時路過一個商店街，本來諗住食完飯去睇下，不過去到已經收晒，其實都係7點幾，所以都係返酒店
番房hea左陣就去浸溫泉，個浴場都幾大，有幾個池，浸完就去食免費拉麵宵夜
比較早去訓，亦訓得幾好，當然啦之前果晚都無訓

第二朝再浸多次溫泉，然後食早餐。係buffet breakfast，除左一般西式同日式食品，主打係刺身丼，有墨魚、三文魚子、甜蝦同帶子，既然係buffet當然係任你裝幾多，直頭食埋lunch果餐嘅份量，好滿足

食飽就執野check out，臨走係大堂斟番杯咖啡飲，無錯大堂有免費飲品供應，然後過對面坐車去札幌，不過未玩札幌住，係去札幌轉酒店車去層雲峽
層雲峽一個優勢就係有酒店提供免費shuttle來往札幌或者旭川，相當於慳番幾千日元火車錢，當然依個唔係去層雲峽嘅原因，最主要係去冰瀑祭

札幌去層雲峽要4個鐘左右，沿途風景都唔錯

住嘅係朝陽亭，去到攞房擺低野就去浸溫泉，係頂樓嘅露天溫泉，可能好多人都係去到未夠鍾食飯又無咩野好做，所以都幾多人浸，個池同環境唔算特別靚，不過都無咩所謂
之後係酒店嘅手信舖行左一陣就去食晚餐，食自助餐，但係質素一般，唔係味道差，而係佢得d平價食物

食飽就返房攞野去冰瀑祭。酒店有shuttle去會場，每15分鐘一班車，只需要幾分鐘車程。冰瀑祭屬於北海道一個規模較少嘅雪祭，不過今年已經係第40屆，有冰城堡同冰洞冰屋，再加上唔同顏色嘅燈光，同埋放左一陣煙花，都足夠玩到佢10點鐘收檔

入場費300日元，有一張明信片同一張100日元飲品coupon，其實抵玩嘅，不過張coupon有d搵笨，因為飲品要300日元而且好細杯
返到酒店房，床舖已經準備好，不過都係上陣網先去訓，臨訓先發覺房入面個雪櫃有d聲

第三日朝早起身，出面幾大雪，有小小擔心影響之後行程，不過唔理住去浸多次溫泉先，再去食早餐
十點鐘坐酒店shuttle去旭川，其實只係過路嘅地方，去梅光軒食左碗麵，再係去JR站時路過西武係咁二行左陣，然後就坐車去美瑛
到達美瑛係車站hea左一陣就到左同當晚住嘅Pension Jacatra約好嘅接送時間。出發之前係佢地個網頁見到有個去Blue Pond嘅night tour，果陣覺得只係Blue Pond stay半個鐘比較短，所以都無諗住參加，但係旅途中係特別易洗錢，所以佢都好易sell到我join
Pension Jacatra有一間兩層高嘅main house，地下係common area、用餐區同浴室，二樓就係客房，main house出面有幾間小屋都係客房
間房都幾大，不過最重要嘅係開揚景色

見有時間係屋外行左陣，再返屋入面抖左陣，好快就夠鐘去Blue Pond
結冰湖面上樹木，再加上唔同嘅燈光效果，值得一遊

影完就返去食飯，揀左食羊肉，自己燒。食完飯又係溫泉時間，依個係人工溫泉
個人而言覺得佢唔夠熱，不過我係鐘意比較熱嘅溫泉
天陰嘅關係，無得影星星，所以十點就訓

第四日朝早起身，又係溫泉時間，其實我都唔係鍾意浸溫泉得咁緊要，不過本身朝早要洗頭，咁洗得頭就唔差在沖埋涼浸埋
早餐係西式早餐，食完就check out出發去佢地嘅photography tour，會車去美瑛多個景點拍攝，中間經歷左多雲、晴天、落雪、晴天

午餐食soba，導遊每人送左張100日元coupon，用完餐廳又會派一張，結果當然係比番導遊

影完相就送去美瑛站，臨走前同導遊同埋同行嘅兩位遊客合照留念後就坐車去札幌，當中係旭川轉一次車，而轉車時間只有3分鐘，所以都幾趕

去到札幌首先去酒店check in，酒店係大通公園附近，其實可以經地下街行去，不過選擇左坐一個站地鐵，去到已經成身汗，係北海道果陣我絕對係驚熱多過驚凍
用一個好抵嘅價錢住大倉酒店，有得坐係度check in，而且間房好大間，唯一缺點係無景
放低野即刻趕去三井outlet，地鐵轉巴士計埋等車大約要一個鐘，有大概兩個鐘買野，行晒想行果幾間舖頭岩岩好。行完街去食番餐好嘅，去蟹將軍食蟹，好精緻，款式又多，個火鍋又有人serve，價錢亦都好貴

不過幸運地有9折，因為去cashier埋單時前面有一檯客人埋完單先醒起自己有9折coupon，但係收銀已經唔比佢地用，咁佢地就將張coupon比左係佢地後面嘅我用，間餐廳應該都覺得好彩，因為我張單細好多。之後行大概一個地鐵站嘅距離返酒店，其實可以行地下街，不過我怕熱所以係地面行，同埋順手去便利店買野飲

第五朝，上晝係市內遊覽，包括北海道廳舊本廳舍，時計台，同埋電視塔，由於札幌雪祭係我走左第二日先開始，所以無緣去大通公園

遊覽完先番酒店放低相機，再去拉麵橫丁食lunch，然後開始今日嘅購物行程，都係札幌站一帶同埋狸小路。買完野就係狸小路食晚餐，食相撲手鍋，好飽，本來想食雪糕，但係都食唔到

食完係狸小路再行一陣，都係食唔到雪糕，不過見時間尚早去睇電視塔夜景，影左一張相先知佢原來9點半熄燈，早知就早d去
不過唔死心去睇埋時計台夜景，總算有少少野睇，睇完返酒店執行李，因為已經去到行程最後一晚

第六日，最後一個要去嘅地方係場外市場，從來無去過日本依類地方，所以專登去行下，即場食野之餘亦買番d手信返香港。首先就係自己食左先，食左個三色丼

食完再買手信，有好多野賣，最後買左兩隻毛蟹同一盒海膽

買左咁耐野，終於有人忍唔住話我買得多野，因為依個係第6份退稅單，佢地仲要同我每版釘一張單，搞到第六個都唔係好知釘邊度好。買完野就返酒店攞行李走人。最初係諗住坐JR去機場，不過睇見自己有咁多野，都係坐機場巴士方便d。巴士停好多站，所以要坐好耐。

去到機場check in，個地勤話我張飛淨係可以寄一件行李，不過今次比我寄兩件，咁即係無問題啦，下次都未必搭你啦，同埋又真係過左重嘅
過完關，仲有少少時間，又有幾百日元，就諗住買盒朱古力洗埋佢
d強國人係咁狂掃，估唔到日本都比佢地污染晒
咁我就梗係買一盒啦，買咁多邊食得晒，不過數銀仔果陣老眼昏花，將個50日元當左做100日元，結果用晒d散銀嘅如意算盤打唔響，唯有遲d再去日本用埋佢啦
同樣地經首爾返香港，本身班機已經夜，仲要delay左少少，最慘係出行李果陣我盒蟹要等到最後先出，搞到差唔多12點先走到

先留名，遲D 再慢慢追文！

已爬，可以參考下行程 XDD

第六日，最後一個要去嘅地方係場外市場，從來無去過日本依類地方，所以專登去行下，即場食野之餘亦買番d手信返香港。首先就係自己食左先，食左個三色丼

邊度黎架？