今年英超好精采！ [復制鏈接]

有哥迪奧拿既曼城，有摩連奴既曼聯，有高普既利物浦，有干地既車路士！再加前列常客阿仙奴，新上位既熱刺、李斯特城；一眾實力不俗既中游修咸頓、韋斯咸，同埋今年有可能招兵買馬，大幅增強既愛華頓！數數埋埋成十隊八隊！今年英超競爭之劇烈，真係往年所少見！唔好話邊隊可以最後奪得冠軍，邊幾隊可以打入前四都唔易估！

未講開季既競賽，淨係睇季前幾隊豪門爭人都夠精采啦。幾乎可以肯定，曼城同曼聯會狂買人。曼城現有班底，除左阿古路、迪布尼、施華呢幾件外，我諗真係半隊波唔岩哥迪奧拿心水。前中後都要買人。曼城似乎會成為今季球季既最大買家！有錢就是任性嘛。同巿死敵都不甘後人，摩頭未宣布成為曼聯領隊，佢個張購物名單已經曝光。「傳曼聯」今年應該「傳」得仲勁仲誇張。第一傳（甚至可能係第一簽）已經係講緊戰神呂布！都唔講補強效果，單單個話題性都已經值回票價啦。球迷既野，你有野比佢幻想下都已經好正了。幻想成真就更加不得了。可以想象到，呂布之後，關公、張飛、趙雲都排緊隊準備加入曼聯（）。至於車仔，原有班底其實已經唔差，適當地補充個別位置既人手已經足夠。例如中堅、前鋒都係需要買人既「重災區」。話時話，今季隊隊球隊似乎都要搶中堅咁喎。曼城、曼聯、車路士，兼夾利物浦，隊隊個中堅位都叫緊救命。講開利物浦，今夏將會係高普入主後首次可以全無限制地參予買賣球員既決定。估計球會都會幾支持佢，唔會係財力上比太多限制佢。可惜，歐霸既失利，意味住利物浦下年無任何歐洲賽事，呢個對於招攬大名球員黎講，絕對係死症。你睇葛斯臨埋門個腳都甩碌就知。睇黎利記都只可以係D 二三線球員到揀卒了。大牌球員似乎都與我地無緣。

上面個幾隊就狂買人補充戰力，下面呢幾隊就要諗盡辦法留人以保持戰力。阿仙奴今夏好快就已經傳第一簽了。比起以往咩都慢吞吞既雲加，似乎呢兩年佢係買人方面會愈黎愈爽手。但比起買人，點留人先係關鍵。奧斯爾、山齊士、韋舒亞全部有傳言會離隊。咁傳還傳，未必真係會離隊既。但萬一真係走咁一兩件，尤其係山齊士，對阿仙奴既打擊都唔好話唔大。今季未開咧已經無左個韋大帝，前鋒繼續單天保至尊。雲加再唔係前鋒線上增強實力，幾靚既黃金中場都無用。以往最擔心既防中同中堅問題，似乎都順利過渡了。係睇佢點攪掂埋個前鋒位者。至於熱刺，現有既班底其實已經十分扎實，原班人馬進入下季的話，只需要少許收購相信已經可以攪掂。問題係，英超隊隊都爭前鋒，今季大熟大勇既簡尼，會唔會走人呢？無左簡尼，熱刺猶如無左隻右手，戰力減半！成個故事又唔同咁講法了。李斯特城即使可以留住大部分主力，下年要兼顧歐洲賽事，以佢既兵源，其實真係好吃力。一係就放棄歐聯，專心聯賽。但比你有機會係歐聯亮相，你又會甘心就咁放棄？至少球員未必咁諗。但兩面作戰，對呢類小型球會黎講，分分鐘吃力不討好，到時兩頭唔岸，可能適得其反。好事變壞事。何況，係咪真係留得住班主力尚且言之過早………



作為利迷，我當然睇好高普。只係擔心今季可以買到咩人。下年無歐洲賽事，有辣有唔辣。球會收入減少係其中，買人難左係其二。但今季可以專心聯賽，未必唔係件好事。兩年前羅渣士帶領利記幾乎可以摘冠，正正係因為無歐聯打，可以專心聯賽，大大舒緩傷患同人手不足既問題。今年希望球會可以係高普既帶領下，係各方面都增強實力，尤其要增強球隊既穩定性。唔好講話爭冠，正正常常打番入前四都好哎。尤其今年要入前四都不易呀。

下年冠軍大熱始終都係不離哥師既曼城。雖然話曼城係各個位置上都要補強，但始終班底實力雄厚，球會財力更加雄厚。哥師個名又夠照，要招攬大牌球員絕非難事。二千萬唔駛就買到根度簡番黎就見啦。佢打唔打得掂英超我唔夠膽講，但下年既曼城肯定係星光熠熠耀英超架啦。唔打得都睇得。何況……點會唔打得？所有有利條件集於一身，下年英超冠軍大熱。至於曼聯，敢師帶領之下，摧殘得太緊要。花左幾億買左幾個大名番黎又賣番，嚴重虛耗球會既財力，又將好多有潛質既年青球員賣鬼哂出去，雖然同時佢又打起左幾件後生仔。不過好難想象呢班後生仔會得到摩頭重用。曼聯下年幾乎可以肯定會大換血。只係，唔知要花一季定兩季先換得哂岩摩頭心水既球員。照以往車路士既經驗睇，摩頭今年都唔會以奪冠為首任。重新打造岩自己心水既球隊會係佢今年既工作。曼聯係佢帶領之下，有機會重入四強之列，但爭冠我就唔多睇好了。至於車路士，今年都似乎係重整既一年。上季傷得太重了，排第十，成為歷屆最差既衛冕球隊。真係令全世界都跌哂眼鏡！干地無哥師、摩頭咁有話題性，咁高調，似乎係穩打穩扎既類型。宣布左加盟一段日子，傳會收購既對象都唔算多，亦唔係咩大牌名星球員。估計佢只會係個別位置增加人手。不過，DC、世三都有機會離隊（或被離隊），泰利都要搵人接班，點樣順利過渡就要睇佢功架了。車路士今季未必會大灑金錢作出大量收購，但我反而頗睇好干地帶領下既車路士。佢務實既作風反而係英超少見。

本人見識少，睇到既野係咁多咁浮面，對西咸、熱刺、愛華頓等球隊亦不太了解。希望大家都講下你地既睇法。分享下你對下屆英超各隊既期望或預測。

老狐長文

期望越大

Numberson:期望越大[表情] [表情] [表情]  (2016-05-25 11:28) 

講邊隊先？

嘩, 千字文回來了呀~~~~~~~~~~支持下先..............

不過呢, 我今個球季九成唔會睇波了, 要等到再下一季先會睇返....

麻凡:嘩, 千字文回來了呀~~~~~~~~~~支持下先..............[表情]
不過呢, 我今個球季九成唔會睇波了, 要等到再下一季先會睇返....[表情]
 (2016-05-25 11:37) 

WHY？湊女？

賠率︰

Man City	2.62
Chelsea	6
Man Utd	6.5
Arsenal	7
Tottenham	8
Liverpool	9
Leicester	26
West Ham	67
Southampton	81
Everton	81
Stoke	151
Crystal Palace	751
Swansea	751
Middlesbrough	751
Sunderland	751
Bournemouth	1001
Burnley	1001
Watford	1001
West Brom	1001

你講果十隊就係熱門果十隊……

p.s. 我今季都唔睇波了，希望再下季有機會睇返，不過放低左有可能唔會再拎返起……

freezefox:WHY？湊女？ (2016-05-25 11:38) 

M...........要寄人籬下一段時間.................不要再說了.............

哥帥個人唔睇好, 有時佢D調動真係......   
佢今次先第一次真正教波, 佢之前教果兩隊自動波都拎到聯賽冠軍

火鳳凰:賠率︰
[table=204,#ffffff,,0][tr][td=1,1,132]Man City[/td][td=1,1,72]2.62[/td][/tr][tr][td]Chelsea[/td][td=1,1,72]6[/td][/tr][tr][td]Man Utd[/td][td=1,1,72]6.5[/td][/tr][tr][td]Arsenal[/td][td=1,1,72]7[/td][/tr][tr][td]Tottenham[/td][td=1,1,72]8[/td][/tr][tr .. (2016-05-25 11:43) 

我之前完全無參加過呢類賠率架。純粹自己靠估架咋。



P.S. 又唔好講到一定唔睇。睇少D 囉。

鮮吊甬仔:哥帥個人唔睇好, 有時佢D調動真係......[表情] [表情] [表情] [表情] [表情]  
佢今次先第一次真正教波, 佢之前教果兩隊自動波都拎到聯賽冠軍 (2016-05-25 11:56) 

拜仁個陣唔講啦。但巴塞時期，佢既對手係皇馬，又唔可以講到佢無對手，唔駛教喎。

麻凡:M...........要寄人籬下一段時間.................不要再說了.............[表情] (2016-05-25 11:48) 

係吹水站講。

freezefox:講邊隊先？[表情] (2016-05-25 11:31)

英超
黎個反高潮
得一隊由頭帶到尾
其他都係嬴下輸下
無野睇

freezefox:我之前完全無參加過呢類賠率架。純粹自己靠估架咋。
....... (2016-05-25 12:03) 

我決定唔再續 NOW，樂視又打死都唔會裝，我又唔鍾意上網睇得咁辛苦……

都無工具去睇，所以就係一定唔睇，無得睇少D……

Numberson:英超
黎個反高潮
得一隊由頭帶到尾
其他都係嬴下輸下
....... (2016-05-25 12:10) 

邊隊由頭帶到尾？