臨時臨急……無咩系統可言，諗到咩就寫咩啦。
未講點寫先叫好之前，講左點寫最唔好先。
香港學生寫抒情文最常見既毛病如下：
1. 無病呻吟。
話明係抒情文，緊係個個係咁抒發個人情感。問題係，邊得咁多「情」比你地抒呢？大家自己知自己事。香港d後生仔，打機上網就叻。對身邊既人和事，大都係不聞不問。最好由朝到晚困係間房上足一日網。對世界，對社會，對國家，對家人，甚至對自己，都全無感覺。無感覺，又何來有情呢？
喂，咁考試要考，無都要有架啦。於是乎，記得唔知幾時邊個大文豪係咁樣，或者見過讀書文摘有篇文大概又係咁寫。不求甚解，但求就手。攞黎用用先。
大佬！你睇個篇野，個作者經歷文革！家破人亡！筆鋒之中當然有哭！字詞之間當然有恨！你飲飽食醉優遊自在，點講得出口呀有d說話。
「冷眼仰天長嘆，嘆天道之無常，嘆時不與我！哀天生我才，苦無伯樂。哭，盈盈奪眶！恨，綿綿無盡。驚覺天地之大，竟無一處可容此襤褸之身！手執那一紙不合格的測驗卷，與老師約見家長的手冊。驀然回首前塵種種，深深領會，人世間之大悲大苦，也不過如此！」
死未！
2. 脫離現實
「苦讀案前，眾睡獨醒。對前途的無望，對人生的無常，苦笑而視。抬頭望窗，但見一輪明月直入眼簾。啊！看那劃破長空的流星！啊！看那耀眼閃爍的滿天星雲！悠悠繁星，盡抺淨我內心的憂鬱傷痛，使我坦然無懼，前赴征途。」
哥哥仔，你住元朗定大澳呀！抬頭望滿天星雲？我屋企係山頂兼住頂樓！望出窗，搵兩粒星星仔睇下都無呀！返加拿大就成天星任你睇！溫哥華除外喎。
仲有，唔好成日啊黎啊去啦……咩年代呀……
「帆影片片，在夕陽的斜照下，點綴得維港更加典雅。」
你講緊二十年前呀？仲帆影？避風塘炒蝦拆蟹個d艇仔都up grade哂啦！
3. 遊談無根
上面個兩篇文章都係例子。即係，成篇文係到講，苦呀！慘呀！痛呀！但講黎講去，都唔知你苦係邊！慘係邊！痛係邊！
感情，係十分抽象既。就好似味道一樣。人地問你，喂，呢碟菜好唔好味。你答！好味呀！係咸架！
阿差唔知咩……
點樣將抽象既味道描寫出黎，就係高下判別之處。所以，抒情文，必重描寫。
你試下描寫下今晚你餐晚飯其中一味菜既味道黎睇下。
順帶一提。所謂抒情，必須夾住描寫。空有一大堆情係咁抒，係咁抒，但全無描寫。你既文章都必然流於空洞無物，游談無根。要將抽象既、繁複多變既感情，「具體化」出黎。就係我地既目的。唔係hunter x hunter個d具體化呀！
講住咁多先。
[ 此貼被freezefox在2005-11-04 00:01重新編輯 ]
