尚賢(宋康昊飾)是一位在醫院工作的神父，每天眼見生命的流逝，讓他感受到生命可貴，希望能挽救更多生命，所以他自願參加一個秘密研製致命病毒疫苗的實驗計劃。不幸地在實驗過程中，尚賢受到致命感染並瀕臨死亡，卻因急救時輸入未經驗證的血液而奇蹟地活過來，但這些血液卻令尚賢變成一個嗜血的怪物，並令他陷入兩難的局面：他要飲血維生，但他的信仰卻不容殺生，究竟如何是好？
尚賢遇見兒時的朋友強宇(申河均飾)及他的妻子泰珠(金玉彬飾)，泰珠神秘的氣息魅惑著尚賢，亦喚醒了他前所未有對愛慾的渴望，相對地泰珠也希望藉著尚賢去釋放一直忍受刻薄的婆婆和無能丈夫的壓抑。尚賢無法自拔地愛上了泰珠，並願意放棄一切，甚至脫下神父袍，他和她已經完完全全地墮入愛慾世界。
尚賢與泰珠的愛慾關係陷得越來越深，越不能離開對方，尚賢決定讓泰珠窺探他嗜血的秘密，這卻令泰珠感到震驚及恐懼，但這恐懼只是短暫的，泰珠決定利用尚賢對她的愛及信任，說服他殺掉她的丈夫，以便二人可以雙宿雙棲。在愛慾的魔力下，一直堅持不殺人的尚賢，會否放下道德包袱，沉淪慾海成為殺人兇手?
撲朔迷離的愛情迷局，到底該如何終結？
=============================
襯車曼大戰打幾句。
我之前冇睇過朴贊郁的戲(之前拍過原罪犯、親切的金子)，但抱有好大的期望入去，因為佢的前作口碑幾好。好﹗睇完啦，講真的確唔差，而且仲好震撼，但可能我一來唔信教，二來的係一個無神論者，對於呢套談討(挑戰？)宗教的電影感受唔深刻，至少個人感覺上唔及的上年睇的蝙蝠俠 -- 黑夜之神黎得直接易明，又身同感受。
首次睇朴贊郁的戲，我覺得好似上左堂有一種血與暴力的教育。佢唔係《殺人犯》咁賣弄血腥，但骨子裡你會覺得好震撼，然後一步步提升你的mood，接受更高層次的血腥與暴力，睇得都幾過癮!! 但睇完o個幾個 hr 都仍然想嘔...
(以下係劇情討論，已反白)
內容大致上上面已經講左，入面亦充斥好多血同色情，呢方面我理解係劇情需要的。套片講神父為救世人醫一個絕症(呢個絕症的八成患者都係歐、亞的未婚男士，喑示只有神父先中招)，反成為吸血的魔鬼，置自己於兩難。想生存咩？就要吸人地的血黎維持生命wor；想自殺？身為神父既佢又做唔出。結果，以身犯險救世人，變成遺害世人、比神遺棄的怪物，都幾慘。
結果，佢的病令佢泥足深陷，愈踩愈深，誘發出更多的原罪，飲病人的血、犯色戒同朋友妻子搞埋，仲殺埋自己個朋友。而另一方面，佢的異能(不死身、身體自己會極速痊癒、可以飛天遁地)令身邊的人露出邪惡的一面，包括要變成吸血鬼回復視力的老神父，想離開地現況而引誘自己殺人的泰珠(朋友妻子)，但神父卻要殘酷的一一去面對，最後，佢揀左一刀殺死老神父，背棄希望得到佢祝禱的教徒，然後同之後變成吸血鬼的泰珠自殺...
論劇情，本身都幾怪雞，但怪有怪睇，反正人生就係既怪誕又矛盾。血同色情的運用係十分之震撼，但唔及黑夜之神的直接易明。男主角做得好好，佢成功演繹出神父的內心矛盾，同埋情感的解放。相關的矛盾仲係層層遞進，第一層矛盾上面已經講左，而第二層係當佢為左救泰珠，竟引來更大的邪惡(例如係為左救泰珠而將佢變成吸血鬼，但泰珠竟愈來愈惡殘)，從而令自己更矛盾。女主角亦唔錯，仲好突出表達到佢對丈夫屋企的不滿，最後到家婆不滿的大解放，呢方面o係韓國男尊女卑的社會應該都幾突出。當然，o個幾幕性愛場面，我估同色戒有得比，但發揮比色戒裡的湯唯更好。
編導都好好，技巧好明顯係超晒班，場景、對白、服裝、鏡頭運用都十分出色，又有箇中深層的意義。最深刻的係當泰珠成為吸血鬼，成間屋(除左個客廳同地庫)變晒白色，o黎平衡返自己太"血跡斑斑"的身分(我估ga ja...)，要用白色平衡自己唔見得太陽光的心理，但o個種白，又令人不寒而慄。同埋，個老神父同主角講想飲佢的血時，主角反而一刀拮死左佢，o個種殺父、推翻自己對宗教信念的象徵，同樣震撼!!!
[ 本文被liuming在2009-11-09 09:41重新編輯 ]
