世盃抽籤結果早有「安排」？
阿根廷再入死亡之組撼法卅萄？
04/12/2009
號碼波溫度出蠱惑
事實上，02年阿根廷同樣跌入「死亡之組」，當時面對英格蘭、瑞典同尼日利亞，最後既分組賽執包袱出局，搞到好多人都懷疑，國際足協係咪要整死阿根廷至心息。至於點樣抽籤「做手腳」？意大利傳媒就話，所有抽籤嘉賓都有辦法，係睇唔到既情況下分辨邊個號碼波代表邊隊，造假話咁易。
《天空體育》舉例，每個波表面溫度都唔同，所以上屆前德國隊長馬圖斯抽波時，拎起個波又放低，跟住「專登揀」代表美國既號碼波畀意大利歎，諗住害死對方。另外，08年歐聯8強抽籤，都爆出過係抽籤前90分鐘，有人係網上預先踢爆對賽組合，如果黑幕屬實，阿根廷想避開法國同葡萄牙都難。
檯底交易？法國第4檔仲著數？
04/12/2009
唔止抽籤結果傳有黑幕，報道話第1檔種子隊名額都係「檯底交易」。西班牙ESPN記者大爆，98世盃冠軍法國被掟入第4檔，妥協條件係得到國際足協保證，佢地會避過「死亡之組」，至於美國得唔到種子隊身份，就會獲得2018年世盃主辦權做補償。
國際足協解釋，今次第1檔球隊主要以10月世界排名做準則，所以當時排第9位既法國失去種子隊身份，但一般相信原因係法國靠「魔鬼之手」淘汰愛爾蘭，國際足協焗住打壓，不過所謂懲罰可能都係表面工夫，實際上法國分組賽對手唔會太惡啃。
西班牙ESPN記者比利亞格拉納認為，身為法國人既歐洲足協會長柏天尼贊成今次第1檔組合，條件係國際足協保證法國唔會跌入「死亡之組」，言下之意，即是暗示國際足協有辦法係抽籤出蠱惑。如果傳聞真確，阿根廷係分組賽就未必會遇上法國，對手好大機會係葡萄牙！
from：http://football.on.cc
