話我多事我都要再講幾句：
1. 桶少為論壇盡心盡力，呢點唔駛懷疑。我亦都唔相信有人會質疑你為論壇著想既動機！不過，原意係好，做出黎既野就未必理想。所謂一人計短，二人計長，三人好商量！好多事，一個人諗好易只諗埋一邊，忽略其他方面，一旦施行，就會變得偏頗。若經過簡單既咨詢，都唔好話開全民大會咁誇張。係咁疑搵多一兩個人問下意見都好哎。咁施行出黎既政策，就會更易為大家所接受。漏動又會少d。呢d，唔算係「樣樣都要問左問右」，而為係施行任何影響深遠既政策前，都應該要配合既必須措施。必要時，啓動「行會」都要。唔係整個「行會」出黎做咩？
2. 朝早頒布政令，下畫就取消政令，呢種朝令夕改既做法最唔合符管理原則。亦為最壞既施政態度。我公司就係咁，攪到天怒人怨。人人無所適從。所以，都係個句，係施行任何一個深響深遠既政令之前，三思而後行。所謂三思，亦包括聆聽意見。
3. 技術支援同行政其實係兩樣野。作為技支負責人既桶少，係技支方面當然有權決定點做。但當事件涉及行政層面，就已經超出技支既範疇。若然未得行政負責人既允許而單方面施行政策，好容易被人越界既感覺。瓜田李下，何必犯險？舉個最簡單例子：
有人用軟件衝擊我地伺服器，為對抗外敵，一d緊急性既對應措施係必要既。呢d係刻不容緩既事，可能真係等唔切大家開會討論，就要即時還擊。咁技支負責人當然要第一時間作出對應措施。最嚴重既情況，你停左個論幾個鐘我地都唔可以講咩。
但相對地，有人留言粗口，雖然我地都係唔容許，但非「刻不容緩」既事情。粗口唔會整冧我地既server架！？係咪。最worst既情況咪版主黎唔切處理，d粗口係到篤眼篤鼻。但呢樣野頂多咪三幾個鐘。大家都知我地d版主online 既時間又長又密。有幾何呢樣情況係無即時處理？就算係，都仲有好多「其他方法」可以應付。馬上就決定整個「刪除粗口軟件」係咪最佳方法呢？似乎未必囉。但係無討論既情況下就即時施行，就會出現頭先我所講既三個問題。
再舉例，有人用大圖片塞死我地個伺服器。所以桶少即時停用img！呢點可以理解。即時既反應可能亦只可以咁做。但事件平靜落黎後，係咪可以有更多方法處理？呢點就已經係行政既問題。絕對有時間有空間討論再決定點做善後工夫。但問題係，我地提出「限制圖片」大小，桶少你已經可以即日做到呢點。咁似乎又唔係咁難做既野喎。既然唔係咁難，咁有會員提出宜家所設定既圖片大小唔合理，點解我地又避而不談，當無左件事，又唔去處理，又唔回應呢？呢d咪就係行政、技支互相衝突，製造灰色地帶既矛盾囉。
最後，都係個句，廣開言路，接納多方既意見。集思廣益，永遠都係管理層最佳既管治方案。希望大家都明白啦！
