http://www.hkdailynews.com.hk/sports.php?id=233085傻問「小白」點解唔射12碼
卡斯拿斯女友笑大人個口
莎拉究竟瞓醒未呀？作為記者竟然唔識波，傻吓傻吓問射咗12碼嘅恩尼斯達點解唔射？有冇諗過射？但其實「小白」何止射入咗，佢呢球仲係獻畀之前過咗身嘅西班牙小將米基爾洛基同死者家屬，意義何其重大，卡斯拿斯係咪應該教下女朋友呢？
上周西班牙鬥法國時，俾拿斯尼、馬維馬田同文尼斯撩，仲差啲食波餅嘅莎拉，唔知係因為驚慌過度，定係太掛住男友卡斯拿斯，喺「雙牙大戰」賽後竟然捉住恩尼斯達，問對方其實願唔願意射12碼？點解唔射？有冇諗過射？人哋咪喺第2輪走出嚟射入咗囉！最慘係個訪問全程電視直播，「小白」尷尬笑咗一笑之後就話：「喔......其實我射咗喇。」，莎拉之後都認衰，仲話預咗會成為笑柄。
半日幾萬人點擊爆笑
咁就梗係啦！呢條片擺上《YouTube》唔夠半日已經有幾萬人點擊攞嚟笑，有口痕友仲反問莎拉呢場波係咪100:98，唉！下次唔該你做足功課先啦！恩尼斯達講到明，呢球12碼同最後勝利都要用嚟獻畀早前癌症過身嘅西班牙小將米基爾洛基，仲有佢啲屋企人，咁有意義嘅事竟然變成笑話一則，因住米基爾洛基今晚嚟搵你呀！
其實莎拉已經唔係第一次惹嚟全球爆笑，喺西班牙對意大利嘅分組賽，直播主持問莎拉點睇場波，佢答：「雙方會有22個人落場」，而喺西班牙對愛爾蘭賽前，佢又話：「草皮濕潤，會令看台上嘅球迷好興奮」，唔怪得咁多西班牙人話莎拉胸部平坦得嚟又無腦，淨係識得喺自己《Twitter》上載同卡斯拿斯行沙灘嘅相，不如妳結婚啦，專心做卡斯拿斯煮飯婆算吧！【本報訊】
