《沉默的高層》 我叫迪雞，嚟咗呢間公司已經超過十年，而家係公司其中一個總經理。
近年來，公司業務大不如前，舊客戶大量流失，而新客戶寥寥無幾，歸根究底，除咗係主要產品供應商改變咗產品質量，未能配合一眾用家口味外，呢一行已經步入夕陽工業亦不可抗力．．．
尋晚睇完歐聯八強，見證車仔反勝晉級，我拖住疲憊身軀，向公司方向慢行，手機突然響起 WhatsApp 訊息．．．「狐主席 call a meeting，速回。」
「Running Fox (狐主席暱稱) 唔係失陷喺首爾咩！？點解突然又返咗嚟！」我隨即打電話搵我地另外一個總經理幪三。
「喂！幪三呀，Running Fox 叫我地開會呀，你返到公司未？」
「呀．．．我炒咗車，要去睇醫生，今日應該唔返喇，你自己應付佢啦。」
頂！幪三條友仔擺明Ａ字膊啦，呢個時候玩射波。
當我返到大廈大堂時，晨早流流竟然兩部高層電梯都壞咗，要行二十七層樓，我有冇咁黑仔呀！但諗起 Running Fox 開「腦震盪」會，如果我仲要遲到的話，肯定畀佢狠狠插多兩嘢，惟有連行夾跑走上樓梯。
氣急敗壞嘅我踏入公司第一步已經問 Running Fox 到咗未，點知秘書姐姐指一指閉路電視螢幕．．．「狐主席同個師奶一齊困緊 Lift 呀，call 咗師傅嚟，佢話今日流會。」我見鏡頭入面個師奶不停指手畫腳，而 Running Fox 就拎住手機係咁按，之後我同幪三都收到佢嘅千字文 message，最後果句問我哋有冇意見，因為佢週末要飛去晏飛路見客，趕住出機場。
本來我想講，反正你 send message 已經可以將訊息通知我哋，既環保，又快捷。但點解係都要勞師動眾，白白咁叫晒我哋親自嚟開會，當時我曾經想力陳己見，最後選擇咗沉默，我認為沉默係必要嘅。因為，我唔想繼續受到千字文嘅轟炸．．．
@迪神 @freezefox [ 此帖被國球旗在2014-04-09 14:42重新編輯 ]
