康文署踢極唔郁 大球場離晒譜
尋晚有睇英超亞洲錦標賽的球迷，肯定畀個場嚇親，或者笑死。尤其呢場波全球直播，話唔失禮就假。咁啱呢兩日有同事係球場做其他工作，見到發生咩野事，實在不吐不快。
星期三晚見到個球場已經唔開胃，點知康文署班大帝就話已經盡力，天雨都無計。康文署踢唔郁，唯有靠足總班同事變身農夫自救，結果佢地同英超賽會，組織近百人「救草小隊」。由星期五天光就展開「雷霆救場」大行動，由朝攪到夜，又曬又淋都無停手。唔係講笑，連足總最大粒個一位都要落場幫手耙。康文署呢？話自己唔識攪，咪得個睇字囉。攪笑，唔通康文署唔識攪，足總班職員會識攪咩？佢地咪又係聽英超的建議，盡量執得幾多得幾多。
唔幫手都算，大佬，唔好攪破壞啦。去到第二日，康文署終於出手，幫手鋪沙。結果搵咗沙灘沙番來鋪。即係貝殼又有、玻璃又有的沙灘沙返來。鋪完沙足總一睇，立即發覺出事。球隊睇場後，一度唔肯踢。結果咪又係足總職員，好似PTU咁，搵幾十個人一字長蛇陣去徒手執，勉強係限前攪掂。唔知以為有炸彈添呀！
仲有一單親自經歷，尋日比賽日，至少有兩個外藉人士，係門口話自己係職員，唔駛show證件就可以係通道直行直過，完全唔需要檢查。平日班聲大大的保安，可以完全唔理。咁我地下次入去，係唔係又指指個鼻就得呢？如果唔得，可唔可以告佢國籍歧視呀？
康文署淨係星期六晚的門票收入，都抽左300萬走。仲未計其他收入的抽水，以及幾支外隊都要交表演稅。兩日計埋，政府至少袋番700萬。咩都唔做，仲要攪破壞都可以有咁多錢？下次搵我做啦，強項呀！
來源:
https://www.facebook.com/keymansoho
