引用第21樓Erikson於2011-12-27 23:13發表的“”:
依d要係現埸先有得講
舉呢幾張為例，現實陽光充沛，絕對唔駛擔心快門既問題。所以，關鍵應該係光圈。
以前未玩過微距，迷信大光圈，下下都2.8 諗住虛化個背景，點知原來微距既景深淺得好交關，2.8 既話，隻蟲個身中焦就頭唔中，腳中焦就眼唔中。所以應該要將光圈收細。今次好多係光圈4或者5.6 ，但發覺仲可以收細。我諗去到8 甚至以上都仲得。
光圈細D，景深無咁淺，就可以成隻蟲都中焦了。今次影既係蜜蜂仲好D，你話蝴蝶呢類大D 既昆蟲，又或者蜻蜓呢類長一長既，景深太淺都係令人顧得頭黎顧唔到尾的。
正如頭先所講，日光之下光線充足，就算收細光圈，快門都唔會慢得去邊。其實影昆蟲，好難有咩「動態」既表現。蜜蜂既飛行速度根本唔容許你有動態既拍攝。至少我地呢類初哥就諗都唔好諗。蝴蝶就有呢個可能。但都係好高超既技巧。我好少見有影得靚既動態蝴蝶相。初哥如我，都係專心捕捉凝固既效果仲好。基本都未做得好，無謂講到賴高深。眼高手低。
要捕捉、凝固昆蟲個一刻，快門一定要夠快。1/200 我相信係最低要求，除非條蟲伏係到唔郁另計。可以既話，盡量提高個快門。1/1000 都唔算係咩。反正強光下，你只要稍稍推高ISO 到200 甚至 400 ，快門就可以快幾級。以宜家相機既性能計，ISO200 或400 唔會有咩雜訊的。絕對可以接受。
反而對焦先蝦人。我個日先醒起，點解唔試下相機配置既人工智能自動追焦呢！對飛行中的昆蟲既中焦命中率可能會稍稍提高。有時十張有一張中已經好好的了。高速連拍都係方法之一，但記住要入去MENU 做某D SETTING。
[ 本文被freezefox在2011-12-28 14:33重新編輯 ]
