得閒要睇, 唔得閒都要睇 (II)
https://www.facebook.com/fong.s.hang/posts/10152447413436985我唔係fb掛絲帶係因為我個icon係用來懷念我仔女，見到會開心啲。
其實掛黃，掛藍，又黃又藍，都係一個個人意見，同人格無關。最多大家講少兩句，搵交嗌係一件好浪費人生嘅事情。(政治係群體社會的必然存在的東西，而政治直接影響你生活，除非你自己一個住深山。唔解釋，講過好多次)
By the way,我支持學生，支持追求真普選。
政見不同，大家可以選擇唔講，或可以選擇聆聽對方，表述自己，知多一個睇法，唔係要別人認同你嘅睇法。大前提係，互相尊重彼此睇法。
冷嘲熱諷，喊打喊殺，語言偽術，唔係尊重，係搵交嗌，冷血，無知，刻毒。
因為政見不同而覺得對方抵死，想對方死，唔係一個理智嘅做法。但我見，好多支持警察嘅人會希望警察打死班仆街示威學生，市民。而呢啲人大部份都係成年人。
其實我好想知道認為示威，抗爭，佔中係搞事嘅人，佢地講嘅原因有咩理據。
阻你搵食？你係咪搵好多？香港呢幾年，搵錢越多就洗得越多，但生活質素下降。住屋、物價，你自己睇。
阻你啲仔女返學？你知唔知返學唔係只係識字同考試。
現實啲講，你有無擔心你嘅仔女將來讀書有成，可能搵5萬一個月，但都係買唔到樓？你擔唔擔心你嘅仔女讀書有成，但要靠送禮，關系，甚至出賣肉體嚟升職？(大陸係咁，銀行，大學教授都係咁)
如果你覺得只要你俾飯佢食，俾書佢讀，佢自然會生活得好，咁，我除左欣賞你嘅天真同單純，都唔知講咩。你都可以繼續鬧爆學生搞事，who cares。知道你質素去到邊，基因係遺傳嘅。
by the way,"大學之道，在明明道。在親民，在止於善"
唔明自己查，不解釋，我唔係教書先生。(大學唔係依架嘅大學)
on the other hand,有人話啲老師罷教唔啱。
"師者。傳道、授業、解惑也"
阻你搭車返工？咁地鐵日日壞車阻你唔阻？你咪又係繼續俾佢加價繼續搭。
搞亂社會？回歸而來，教育政策朝令夕改，越來越多直資，學費越來越貴，亂唔亂？
市建起樓，奇則過長江，貴過私人樓(市建係以市價七成收購舊樓重建)，亂唔亂？
發展局長陳茂波，搞劏房，屯地，醉駕，證據確鑿但不被起訴或調查，不用下台，亂唔亂？
同樣潛建，唐唐要上身，梁振英無事，重要講大話，亂唔亂？
如果你覺得以上都無問題，唔亂得過上街示威，咁，ok。都係個句，明白你咩人。
民主係亞洲人社會一向都係一個傳說。
對中國而言，從來只聞樓梯響。
我理解有啲人唔覺得要有民主，認為民主不能當飯吃，不能當錢買樓，不能挽救經濟危機。
但民主，令政府要對人民負責。
係民主嘅基制之下，漠視人民生計，漠視人民訴求、貪污腐敗、講大話、用人唯親等等嘅政府，都要負上政治責任，落台，或整個政黨收皮。
所以馬英九領導嘅國民黨，應該好快會收皮。
"水能載舟，亦能覆舟"就係我地孟子先生用八個字概括左民主基制，有得簡，先至係老闆，而政府係人民納稅所養，人民，係老闆。政府，天生應該對人民負責，否則，叫極權。
而經濟危機，全球性，係必然性。有生必有死；有經濟就有經濟危機；結婚就有機會離婚。同一道理。
點解一人一票，有得選，都唔袋住先？
新加坡一人一票，但市民甚至唔敢係公眾場合討論政府；
北韓，一人一票，選來選去，只有姓金家族，次次都無對手下勝出。
我唔知咁樣選，選嚟做乜，浪費紙張好唔環保。
提名需要過半提名委員會通過，個會就得1200人，而呢1200號稱來自各界人民。我真心好想知，邊個代表我？識你老鼠。
而點樣過半數提名同有得簡？即係一個人可以提名幾個人？提名港姐都唔得啦。你又呃我未瞓醒。
我唔會袋舊屎係身，如果你會，我佩服你，真英雄。
有好多人話：無用架，中共唔會俾你簡，你地真係白痴。
我想問，咁孫中山係咪白痴？
反抗，唔順從，示威就代表搞事，擾亂社會，暴徒。
咁反清復明、太平天國個班人，一定係失敗嘅人渣。
孫中山就實係魔鬼，辛亥革命係學生攞槍打清兵。
咁點解孫先生係國父(大陸人都係咁叫架)、黃花崗72烈士點解有紀念碑？
(唔明自己查)
如果無辛亥革命，你可能仲扎緊腳，或者梳緊辮。
唔好因為華人二千年帝制種植入血嘅奴性令你覺得無選擇，咁樣，好唔理性。
前教育局長李國章話罷課無用，又叫學生返去讀下歷史。我唔知佢讀個本歷史書同我地讀嘅係咪係兩個太陽系。
但我知道，一次大戰之後，中國身為戰勝國，民國徐世昌政府係巴黎和議上簽署賣國於日本嘅<二十一條>賣國條約之後。北京大學生衝上簽約代表屋企，燒佢數簿，打佢老味，政府當然扣捕。
跟住，引發54運動。全國罷課罷市支援北京學生。結果，總統徐世昌辭職，簽約代表辭職，國民政府無係巴黎和約上簽名。
當年中國，4億人，超過9成係文盲。
佢地都要搵食，都要生活，都希望仔女有書好好讀。
讀書，唔係識字咁簡單。
再有人話，就算梁振英落台，咁點？你班人，搞完事，想點？下一步點？香港會變成點？邊個做特首好？
我唔知，我相信無人會知，話自己知個個，你都唔好信。佢一係就係上帝；一係就係風水師，仲要係陳嘅風水師。
學運，唔係你想象咁容易，唔返學，坐係街玩。
班學生比返學更辛苦，早晚留守，開會，係現場安排同運送物資、派水派食物，收集垃圾，叫人冷靜。廣播最新消息。
佢地嘅所謂輪更，係沖涼，瞓兩三個鐘，但電話group chat不斷響。佢地除左已有被捕嘅準備，犧牲前途，仲要服侍我地呢啲人。
同學們爭取嘅，唔係自己嘅利益，係香港嘅將來。
我自問20歲嘅時候仲一舊飯。
我地為拍片交功課都會嘈交。
但呢班學生，來自中學同大學，唔同學校，合作做一件無利益，有損失嘅事。
你話，係咪好唔理性？
有人話，去示威嘅人收左錢，五百蚊一個。
你有無證據？定記錯係反佔中？反佔中派錢派禮品叫人遊行，就證據確鑿。但我想問，有無人有證據去7.1遊行，7.2靜坐，同今次學運嘅人有錢收？
如果有，唔該話我知，我要追數。
好老實，我每日嘅人工都唔只呢個數。
支援學生，唔係因為好得閒，食飽無嘢事。要返工，再去支援，又熱，又焗，企幾個鐘，又或者坐地下，有可能被捕，受傷，返屋企仲要照顧啲狗，睇住事態發展，擔心學生有事，辛苦過我開24個鐘頭工。收二千一日都唔值。
外國傳媒俾左個名叫"雨傘革命"，我定性為學運。佔中又好，學運也好，都係一個名詞，唔好因為你對三子或者民主黨反感，而抹殺學生嘅付出。
你覺得學生收左錢，黃之峰收左錢，示威收左錢，有著數。呢個係你嘅睇法，係你嘅價值觀，因為你唔相信有人會唔收錢又付出。
咁，紅十字會一定係賣血。無國界醫生一定係賣器官。
這樣的人生好可悲，因為，你除左錢，什麼也沒有。
學生從來無敵視警察，敵視警察嘅係政府。
我認同警察變左磨心，因為佢地係29/9已經正式被政府出賣。羅范講左，劃清界線。
警察係公僕，警察制服代表保護市民，維持公義。警察做左乜，大家有目共睹。
什麼是公義？向手無寸鐵嘅市民衝擊，用盾牌壓？然後噴胡椒噴霧？放催淚彈？
有警察寫文話俾人踢，我想問，你地立於盾牌之後(盾牌是全身咁長)、鐵馬之後，除非係黃飛鴻反生，否則，真心唔知點踢得到。
無錯，紀律部隊要服從命令，但你如果仲係一個人，你應該有良心。
8964屠殺學生嘅，係從外地調派嘅軍人，因為北京軍隊唔肯。唔好再話你迫於無奈，唔成立。
用左兩個半小時寫呢篇文，唔係因為我好得閒，係因為，不吐不快，係因為理性，係因為，香港係我屋企。
