引用第20樓智者於2010-07-03 01:04發表的“”:
真? [表情]
未揼石仔先揼骨
鄭大世北京鬆一鬆
鄭大世（紅圈）食完飯去揼骨，揼完成身鬆晒。互聯網
之前傳過喺今屆世盃分組賽 3戰皆北嘅北韓，返到國家之後會受皮肉之苦，班球員會俾人捉去揼石仔，唔學似法國同埋意大利咁幸福，喺機場俾班慶過火屎嘅球迷問候幾句就算。我求大俠唔知傳聞係真定係假，不過就知道佢哋喺返北韓面聖之前，去咗北京鬆一鬆，其中鄭大世仲鬼咁風騷，事關佢喺北京人氣爆燈，簽名都簽到手軟。
北韓喺世盃被編入死亡 G組，對手有巴西、葡萄牙同埋科特迪瓦，所以 3場輸晒好正常；究竟佢哋會唔會俾北韓「揸弗人」金正日重罰就要遲啲先知，但佢哋班球員仲有心情去享樂，睇怕回國之後應該都冇乜嘢嘅。喺上個禮拜五打完對科特迪瓦場波之後，北韓隊就打道回府，而佢哋因為要喺北京轉機，所以前日喺北京停留咗一日，順便飲飲食食。
聽講鄭大世同班隊友喺北京東大橋附近食完烤肉之後，仲聯同同佢一齊喺日本打波、效力大宮松鼠嘅安英學，齊齊去揼骨；不過大家咪心邪，佢哋係揼正骨啫。
效力川崎前鋒嘅鄭大世喺自己個網誌度話：「家陣係北京時間禮拜二清晨 6點半，我瞓極都瞓唔着，惟有起身。唔通我晏晝瞓多得滯，搞到夜晚瞓唔着覺？頭先我去咗揼骨，真係好舒服，所以唔覺唔覺瞓着咗。我呢次揼骨係非一般嘅揼骨，係揼勻全身同埋腳板底，真係超舒服呀！而且仲係安英學找數，多謝英學哥。」
鄭大世喺世界盃雖然冇入波，但首戰巴西奏國歌時，因為感動得滯而咇咗兩行眼淚出嚟，令佢一哭成名，仲令佢喺北京做咗名人。佢咁講：「我喺北京似乎做咗名人。喺酒店每一個人都有擰轉頭望我，睇嚟我真係人氣高企，世界盃對世界各地嘅影響，的而且確好大；喺食飯嘅時候，我對手忙過不停，事關啲服務員逐一嚟搵我簽名，呢啲都係一項工作，我當然來者不拒啦！」鄭大世咁識做，第日肯定大把世界。
