聖誕當然要買禮物，利物浦陣中兩位西班牙國腳路爾斯加西亞同沙比阿朗素，日前就約埋去購物中心掃貨，點知佢o地好衰唔衰，撞正同市宿敵愛華頓o係度搞簽名會，出席ge仲要係靚仔球星卡希爾，結果加西亞、阿朗素畀幾百個「拖肥迷」玩o左一輪，好快就面懵懵咁做快閃黨離開。
撞正愛華頓搞簽名會
原本紅軍孖寶都逛得好開心，點知佢o地愈行愈唔對路，突然發現自己「誤入敵陣」，被幾百個敵對球迷重重包圍！原來愛華頓推出新DVD，仲搵o左養緊傷ge卡希爾做生招牌，擁躉自然排長龍o羅簽名。最冇癮ge係，利物浦今季ge打o比戰作客淨吞愛華頓三蛋，當時打開紀錄ge正係卡希爾，搞到佢o地鬼死咁尷尬。
可能排隊冇咩野做，部分愛華頓擁躉索性扮問加西亞、阿朗素o羅簽名，玩下佢o地，紅軍孖寶睇見對方冇咩敵意，只好笑住口照簽。不過有球迷叫加西亞、阿朗素不如排埋隊同卡希爾傾幾句，佢o地就即刻耍手擰頭嗌走人。梗係啦，當時有咁多記者在場影緊相，如果佢o地真係「變節」搵卡希爾o羅簽名，返到晏菲路球場隨時畀d球迷鬧死。
咁烏龍ga 佢o地
好彩拖肥fans...唔英格蘭d fans...唔係ge話 出唔番o黎都似.....
