阿仙奴被森林淘汰前夕，伊禾比夜蒲兼疑開毒P至半夜3點
阿仙奴快車期聯賽4戰只得1勝，都仲可以話和到利物浦同車路士，勉強收貨，但喺足總盃竟然以4-2不敵英冠球隊諾定咸森林，加上有傳即將出售山齊士、高基連、迪布治、禾確特等將，成績、士氣同陣容深度上，情況都十分令人擔憂。獲得雲加重用既小將伊禾比，最近被英國傳媒指，喺對諾定咸森林前夕狂歡至深夜，而佢喺比賽中表現確實未如理想，為兵工廠再添紀律問題。
呢位21歲既尼日利亞小將深得雲加信任，唔少球迷都對此不滿，其實此子確實有一定天份，佢腳下功夫不俗、傳球富想像力，但動作往往俾人慢半拍既感覺，decision-making亦未如理想，呢方面的確係佢要加強既地方。喺足總盃作客諾定咸森林一役，喺輪換陣容之下，佢出任正選攻中，身邊既只係禾確特、艾蘭尼、韋碧克幾位平平無奇既一隊副選，加上小將韋諾克 (Joe Willock)及尼爾遜 (Reiss Nelson)，要佢做組織核心派牌實在係巧婦難為無米之炊，而球隊亦都冇第二個擁有組織能力既球員在陣。
結果，球隊進攻毫無板斧，只靠隊長梅迪薩卡死球趁亂射入一球，同韋碧克幸運地把握對方門將甩手建功，防守上被對手策略性打爆，輸2-4出局。喺《Sky Sports》賽後報告中，伊禾比獲評不合格既4分，全隊只有直接犯錯導致失波既賀定得到更低評分。喺《Whoscored》評分中，佢都只得到6.2分。
如果表現差但努力過，球迷應該冇咁嬲，例如球迷對於勤力跑動既韋碧克就寬容得多，不過伊禾比最近傳出令人失望既消息。英國《The Sun》最近公開咗一段清楚拍到伊禾比既片段，聲稱佢喺作客諾定咸森林前一晚，喺倫敦中部一間屋入面開party，玩到半夜先走。
《The Sun》稱該段影片係係半夜2:37am拍下既，佢哋又指呢一間Airbnb出租單位既鄰居投訴，該單位既噪音持續至半夜3:30am。咁都未算，報導指出個party中，有其他參加者喺度吸食大麻同吸笑氣，雖然冇證據顯示伊禾比有份，但都反映佢有明顯既紀律問題，唔知道被指係雲加會唔會嚴懲佢呢？
https://i.imgur.com/WtFDIYm.png
Source: The Sun、Daily Mail拍
[ 此帖被freezefox在2018-01-09 18:00重新編輯 ]
