好彩!真係好彩!唔係講緊酒樓!係講緊98年世界杯冠軍法國隊最後成功出線。
法國首兩戰得兩分，最後一仗對多哥不容有失，結果憑韋拉及亨利的入球取勝。不過，在「庸帥」杜文尼治的帶領下，縱使法國隊最後平安無事，到淘汰賽階段仍然不許樂觀。罪人?法國隊當然有罪人，邊個?咪迷信程度達101%嘅杜文尼治，杜文尼治衰乜?首推梗係迷信，其次係臨場指揮。講真，想法國再次衝擊世界，杜文尼治唔炒唔得，如果閣下係法國隊「粉絲」，不如閣下寄望法國早啲出局，等法國足總換個有腦領隊。
用「點到你唔服」嘅「星座點兵」係杜文尼治一貫「作風」，杜文尼治認為天蠍座球員容易分化更衣室內部氣氛，影響士氣咁話喎!就係咁，已轉投維拉利爾嘅前阿仙奴球員比利斯就咁成為犧牲品，真係「陰公」咯!
「星座點兵」已經俾人鬧到飛起，但杜文尼治「意猶未盡」，提交法國隊嘅二十三人大軍時，將今季表現「top fit」嘅巴塞隆拿翼鋒古利踢出局。而杜文尼治又向外宣佈「神經門將」巴夫斯穩坐第一把交椅，激到里昂嘅穩健門將哥柏一度出走。而杜文尼治今屆世界杯嘅心目中正選陣容更係無「髮」無天，首兩仗嘅陣容除沙洛及施丹外，其餘九人都係「啊彌陀佛」，鬼咩!杜文尼治迷信嘛!佢認為光頭球員會為球隊帶來好運，咪以「少林法國」出戰。
杜文尼治迷信不特止，臨場指揮換人都好唔掂。首兩仗杜文尼治寧用日漸退步嘅韋托特都唔係查斯古特，到最後一仗對多哥嘅生死戰先識得死，放番查斯古特打中鋒。睇落查斯古特都幾可憐，係生死時候先有得打，連領先嘅情況下都冇得落場。法國領先南韓一比零時，雙方都係中場拉鋸，但杜文尼治都唔換個前鋒落場牽制住南韓，到八十一分鐘被追和，仍然對查斯古特「冷淡」，到補時階段先換佢落場，心諗：補時先換，換嚟做乜?
杜文尼治嘅罪狀唔止咁少，佢挑選嘅二十三人大軍大部分都係98年捧杯嘅功臣。八年時間，施丹、杜林、巴夫斯等已達退休之年；迪西里、比堤等亦已掛靴。而杜文尼治仍倚重這批經驗老到嘅老將，導致法國隊活力大減。經驗豐富唔係話唔好，之不過冇活力都死，你睇吓阿仙奴，有邊個估到佢會入到歐聯決賽，結果喺一大班年輕有活力嘅球員下咪得咗；經驗豐富係可以穩定軍心，但英格蘭足總杯決賽打到去加時，舒寧咸連跑多步都喘氣，等同減慢進攻節奏。結果喺冇施丹之下，法國終於取得八年來嘅世界杯勝利。
杜文尼治倚重一眾老將，即一班年輕小將沒有上陣機會。法國現時係新舊交接期，施丹、杜林等在世界杯後交捧，進攻中場位置上有列貝利、馬朗達及剛轉投AC米蘭嘅哥古夫，中堅位置上有史基拿斯同基維兩名摩納哥後衛；不過令人擔心嘅係門將嘅接班人，巴夫斯同哥柏已經三字頭，轉投巴黎聖日門嘅拿度奧國際賽經驗又唔夠，費爾入選次數又唔多。杜文尼治真係需要好好留意新舊交接，萬一青黃不接就大件事。
–hk20020062 06.6.24
