apple...
10招攻撳錢
2011年02月18日
小小超李澤楷扯頭纜一星期派足六日錢的 now遊戲節目《撳錢》，每集都為數萬港人帶來 10萬大元的橫財夢，成功掀起全港撳錢熱潮。觀眾要連中節目中的 8條棘手問題唔容易，但你有張良計，我有過牆梯，成千上萬的網民在家中集思廣益，約齊三五知己圍「腦」共聚，各自拎住 iPhone、 iPad、文房四寶十大武器鬥快通水兼上網搵答案，本報記者綜合十大攻略破關！採訪：夏琴
全城《撳錢》攻略大披露
1〉搵高手
反正遊戲不限人數，多個人點都有 so，當然若網羅財經專家、中大碩士、運動健將、文人學者等奇人異士，答中機會梗更高，但最怕人多手腳亂而出現意見分歧。建議一 team四人為之 perfect，多隻香爐多隻鬼。
2〉上高登
45秒作答時間，經常搞到倒瀉籮蟹。萬一唔識答，上網又未 google得切，點撳錢？除了靠撞博四分一機會外，上 facebook的「 now101撳錢答案交換區」，還有借助高登仔神奇思考力，雖然未必一定中，但最少有得參考。
3〉打電話
大部份觀眾家中只得一部電視裝有 now機頂盒，話明玩《撳錢》宜集體考腦力，所以參賽的家庭觀眾應開手機 speaker，跟其他在家中玩緊遊戲的親友交流，即係細胞分裂，由一個家庭變成幾個家庭齊齊玩。
4〉專撳掣
要有效率地玩《撳錢》，一定要家中在場人士分工合作。作答時間一開始，各人上網、開手機 speaker狂 call，一屋嘈喧巴閉手忙腳亂之際，必然要騰出一人做人肉報時器，專責倒數及按遙控器揀答案。
5〉摷谷歌
《撳錢》問題大包圍，冷知識、時事、健康、體育乜都有，最方便和最多人選取的方法，必然是開定電腦設定沒有立雜視窗的 google（谷歌）首頁，靠打字手快速搜尋問題 key word，以最短時間找答案。
6〉信 Keyman
每集節目有 4個主持，每位主持持有兩條問題及答案。當主持出題目時，觀眾可以化身讀心神探觀察主持的微表情微動作博一博。通常主持又會畀貼士，暫時結論是 Keyman馬啟仁和盧覓雪貼士最準，洪永城專放山埃。
7〉擸架生
自從出現過 100港元紙幣的面積是幾多平方厘米的刁鑽問題後，原來觀眾要準備文房四寶，之首就當然係計算機。既然出題估佢唔到，大家也不讓「聞西」羅家英專美，擸齊攞你命三千如秤、尺等各式度量衡架生。
8〉八腦陣
四人同時分頭 search答案最穩陣，因為每條問題都提供四個答案選擇，一人專注搜尋一個答案，命中率就高得多。所以，四部電腦是最佳之選，四個人腦諗加四部電腦查，八腦合一同《撳錢》博過。
9〉逆思考
遇上陰濕問題而又不肯定答案，可嘗試逆向思維，即「扒冷」揀最冇可能的答案。就如「哪隻馬贏頭馬比率最高？」人人聽過「精英大師」、「靚蝦王」和「活力先生」，結果「盈彩繽紛」跑出。
10〉撞黃色
假使九招撳錢攻略用盡都苦無頭緒，大家可理性地撞一撞「黃色」。據早幾日的《撳錢》題目指示，在過去幾集的節目中，正確答案是黃色的機會率，是四色之中最高。
[ 本文被liuming在2011-02-18 09:32重新編輯 ]
