林欣彤巨聲蕩天涯 身高只有 5 呎 1 吋、體重不足 100 磅的林欣彤（Mag），自小體弱多病，名副其實的人肉藥煲，但她在無師自通努力下，竟練得一把巨肺低沉聲線，在無綫《超級巨聲 2》中突圍而出，明日隻身力戰五男，勝負似乎早已有眉目。身為家中長女， Mag 坦言憧憬做歌星出碟，只為求搵錢早日擔起頭家，以歌聲唱出一片新天空。
經過約三個多月的無綫《超級巨聲 2》比賽，目前剩下最後六強明日進行生死決賽，選出最後的一把巨聲。六強當中只有一位女將──年僅 20 歲的林欣彤，她透露將以拿手的英文歌出戰。可惜決賽前夕， Mag 受到氣管敏感以及喉嚨發炎困擾，令她忐忑不安。唱功早已被評高出其他參賽者幾班的 Mag，是否已坐定粒六成為冠軍？她前日接受本報記者訪問時笑說：「一半一半啦，外界嘅支持係畀到信心我，但亦有一半係壓力，加上而家狀態唔係咁好，我都好擔心做唔到令大家失望。」
雖然尚未正式成為娛樂圈一分子，但 Mag 已感受到無形的壓力，更因此而病倒。但其實比賽進入中段， Mag 的唱功已被看定為無敵，問她比賽時會否感到乏味無挑戰性？她即耍手擰頭說：「我完全冇呢種感覺，大家都係誇獎我，我唱歌以嚟一直覺得最緊要係感動到人心，雖然技巧都好重要，但我覺得感動比起技巧更重要。」難怪 Mag 揀選戰歌都是以感覺行先，先要感動自己才可打動人心。近年主力聽英文歌的 Mag，至愛是瑪麗嘉兒（Mariah Carey）、 Christina Aguilera 和 Alicia Keys，她表示也有聽關心妍和鄧紫棋（G.E.M.）的歌曲取經。
出身小康之家的 Mag，從來沒有跟老師學唱歌，只是由小到大喜歡，但因小學六年級在唱歌考試中遇到首位伯樂，音樂老師讚她有天份，因此她的起心肝認真聽歌來練習模仿，她說：「總之我聽到一啲我好鍾意嘅歌，我就會係咁練係咁學個歌星點唱，練到得為止，我試過一口氣係咁唔停唱咗兩至三個鐘，而我第一首練習嘅歌就係關心妍嘅《負擔不起》，佢係我第一個模仿嘅對象。」 Mag 自爆最喜歡在家中的廁所練歌，貪地方細細有迴音效果。在《巨聲》比賽中， Mag的聲線被形容為 Alicia Keys 上身，同屬低沉磁性，原來這是她苦練得來的成果，她表示：「其實我以前把聲係高音啲，比較薄，但因為自己好羨慕人哋聲底厚，所以我係咁練，結果練成咗。雖然我好鍾意而家把聲，但把聲就去唔番以前咁高，我都想補救番，咁就高低音都可以唱到。」人仔細細但氣量驚人， Mag 表示巨肺並非天生，而是後天努力練成，果然成功非僥倖。
Mag 自言目前未有和任何公司斟洽簽約，她坦言有想過做歌星出碟，但不少問題令她猶豫不決：「呢個問題我諗咗好耐，我都想快啲出嚟搵錢，等爹哋可以早啲退休，由我養佢哋，但我又怕屋企人要受壓力，加上做歌星收入唔穩定，大家都知做歌星星運可以好極端，一係可以好多工作，但亦可以完全冇收入。」 Mag 自小體弱多病，她坦言擔心身體未必能應付圈中繁多的工作，令她增添一種顧慮。雖然雙親未有反對她加入娛圈，但 Mag 和父母都有共識，無論如何也要完成最後一年的航空與客戶服務高級文憑才為前途作決定。
明天林欣彤將進行決賽，姑勿論誰是最後的超級巨聲，她自言已得着很多，當中最可貴是認識一班志同道合的好友，她表示當中最老友的是陳慧敏、馮琛以及朱愷瑤。除了一班老友外， Mag 慶幸遇上 Miss Chan Chan 陳潔靈和杜麗莎（Teresa）老師，即使當日被 Teresa 狠批也未有不開心， Mag 說：「大家都話 Teresa 好惡，其實佢都係想我哋好，好似當日佢要我重唱《Desperado》，都係想畀機會我，證明我係可以做多啲，唔係想踩我一腳。至於 Miss Chan Chan 就好似我哋媽咪咁，無疑係易親近啲，佢好想見我哋進步。」
感情方面， Mag 表示和前男友分開三個多月，現在仍是好朋友，舊愛不時叮囑她小心身體，至於被傳唱唱吓撻着的羅孝勇， Mag 對他有讚冇彈：「佢係個好男仔，冇不良嗜好，我好欣賞佢，識唱識作。」 Mag 強調兩人沒有拍拖，但不排除發展，說時她滿面通紅，一切盡在不言中。
用高音甜、中音準、低音勁來形容 20 歲《超級巨聲 2》大熱林欣彤實不為過，年紀輕輕的她在比賽中一枝獨秀，無論唱英文歌《If I Ain't Got You》、國語歌《心動》，抑或廣東歌《無人完美》都勝任有餘。其中她日前唱出 G.E.M 的《A.I.N.Y.》，以 92 高分 KO 大馬歌手，在 YouTube 的表演片段已累積 81 萬瀏覽次數，認真厲害。事實上，林欣彤過往在歌唱比賽中屢獲殊榮，分別於 08 年在十八區超新星歌唱大賽中奪得冠軍，以及第 16 屆香港專業教育學院（青衣）學生會歌唱比賽冠軍。
http://hk.apple.nextmedia.com/template/apple/art_main.php?iss_id=20100911&sec_id=462&subsec_id=830&art_id=14438725
