夢熊哀人在旅途灑淚時2012-03-28
選舉畀同路人妒忌 「禍及家人」
【明報專訊】「淚已流，正為你重情義；淚乾了，在懷念往事……」唔知呢幾句《人在旅途灑淚時》嘅歌詞，係唔係梁振英（CY）支持者、政協委員劉夢熊嘅心情呢？事緣劉夢熊噚日發表咗一篇題為「人在旅途灑淚時」嘅微博文章，大嘆選舉殘酷，更講到畀同一陣線嘅人妒忌、切割，甚至「禍及家人」！如今CY贏咗，夢熊話，佢只記住總理溫家寶所言﹕「知我罪我，其惟春秋！」意指功過由歷史評斷。
被指敲冷係傻佬
劉夢熊喺網誌話，佢唔係競選辦成員，只係首個出嚟撐梁嘅政協委員，當時有人勸佢話好多同佢有生意來往嘅大財團都支持唐唐，而唐唐喺中秋節時更加請佢食飯「示好」；有人更同佢講，梁振英只係陪跑，「你去幫佢，得罪好多人」、「放着贏硬的大熱門唔買，去買99倍大冷門，真係傻佬！」
泳褲闖香江 所以撐CY
夢熊話，回想當年自己「一條泳褲闖香江」，所以對梁振英出身微寒、發憤圖強感同身受，加上佢好認同梁振英嘅理念，所以先企出嚟支持對方，但政治尤其係選戰就係殘酷，佢形容自己
「不僅有來自對手營壘的抹黑、暗算、栽贓、陷害，也有來自同一陣線的妒忌、讒言、誤解、切割，甚至禍及家人」。睇完篇文，似乎劉夢熊對梁營中人都好不滿喎，但點樣禍及家人，Emily噚日未能聯絡到劉夢熊，所以都唔清楚，會繼續查究一下。
http://news.sina.com.hk/news/2/1/1/2619768/1.html 
