【投資足彩入門】 [復制鏈接]

【投資足彩入門】(寫於2006年1月29日)

【以下文章, 未經作者同意, 不能轉載, 取用, 分享作任何形式的商業用途, 違者必究】

【如想轉載下列文章, 或作任何用途, 可直接與本人聯絡, hkjaypoon@yahoo.com.hk】

一直很想寫一篇關於投資博彩的書(沒有說笑, 是一本書!), 分享一下博彩心得,
將一些經驗並研究公諸同好, 不過一直苦無時間, 這個新年假, 終於立下心開始去寫.

首先聲明, 這篇文章目的並不是鼓勵賭博, 這是一篇我認為是曾經參與過足彩, 或是將來會
繼續參與者必看的文章. 沒有錯, 是必看!

如果在看完第一章節之後, 你對足彩沒有更深一步見解, 我建議你不要再看, 因為你已經係
一個專家.

賭博同投資既分別, 在於賭博係睇心水, 講運氣, 等於去賭博買大細, 開大開細永遠係48.61%,
以科學既角度去睇, 長買你一定輸錢. 試下問自己一個問題, 你買波既時候, 投注其中一隊時,
你係乜野原因去下注該隊呢, 自己愛隊? 自己既心水? 覺得佢會贏? 直覺? 該隊已連輸幾場, 係
時候反彈? 臨臨種種, 如果你既答案係以上任何一種, 唔好意思, 你係喺度進行緊賭博, 基本上同
買大細分別唔大. 對唔住, 係有分別, 分別係你既回報率會比買大細更低. (因馬會/澳彩的食水更深)
所謂十賭九輸, 以我咁多年經驗來看, 可能係百賭九十九輸, 甚至乎係千賭九百九十九輸!

至於投資, 係基於一系列既數據, 歷史, 資料等, 配合研究, 運算等去增加資產增值機會. 請留意,
呢度講既係增加贏既機會, 因為無一定贏既賭博投資. 你一定會問, "唔好玩啦, 賭波都有得計數?"
我可以好肯定答你 -- 係, 係真係有得計, 只不過係睇下你識唔識計!

就以本人為例, 98年開始於澳彩投注, 一開始玩, 唔理三七廿一, 有波就買, 睇岩又買, 給果係98-02
年四年賽季, 累積虧蝕了$124,930! 對, 係十二萬幾, 平均每年蝕三萬幾! 自從02-03季度開始左
計算之後, 該年有$8,827盈利, 03-04季度有$16,283盈利, 04-05季度則有$15,844盈利, 05-06
即係今年度至目前已有$19,239盈利!

相信各位一定好想知道計算方法, 及如何計算, 不過事先聲明, 呢個絕對唔係廣告, 或者係叫你或
鼓勵你作任何賭博, 而只係分享一下心得. 一句說話 -- No Easy Money. 永遠無容易既錢財. 至於
如何運算, 將於稍後分解...

【投資足彩入門】之一 (寫於2006年1月29日)

認識賠率

一般黎講, 起碼在我認為, 以我觀察, 一般波迷買波, 都係今晚有邊場波, 買黎過下癮,
邊個得閒會開個 Excel File, Set 晒 Formula, 逐條數去計呀, 大佬!

要認識賠率, 首先你必須認識派彩率.
何謂派彩率? 其實非常簡單, 就係話每一個彩池, 究竟庒家羅番幾多出黎作派彩.
舉個例子, 唔知各位新年有冇玩過射龍門(啤牌朵隻), 或者三公大"立", 或者show hand 等.
通常呢類遊戲, 都有大彩池, 邊個贏左就"立"晒, 不過同庒家玩(馬會或澳彩等), 佢地會先喺個
大彩池抽左水先, 餘下先到你地去分, 所以佢地永遠都立於不敗之地, 至於庒家抽水幾多, 羅
番幾多出黎作派彩, 呢個就係叫派彩率啦.

一般黎講, 假設總彩池係$100, 如果庒家拿$90作派彩, 派彩率係90%. 但係要留意既係,
派彩率90%, 唔等於你買100蚊可以贏倒90蚊, 假設你買100蚊大, 另外一面有人
買100蚊細, 總彩池係200蚊, 庒家抽水後, 只有$200*90%=$180 作派彩, 輸家$100
冇晒理所當然, 贏家亦只能取得$180, 從個人角度黎講, 即係$100博$80. 從庒家角度黎講,
派彩率係90%

呢個第一個章節, 將會以一個庒家既角度, 比你對賭博呢個遊戲有進一步既認識.


主客和 (標準盤) (或讓球主客和)

一般來講有3個賠率, (1) 買主, (2) 買和, (3) 買客, 因為有3個賠率分散視線, 所以食水
一般較深.

以香港賽馬會為例.

保頓 對 阿仙奴
主--和--客
2.38 3.30 2.50

派彩率計算
=1/(1/主+1/和+1/客)*100%
=1(1/2.38+1/3.3+1/2.5)*100%
=89.03%

即係話, 你買一百蚊, 無論你係買主, 買和, 買客都好,
馬會將會收起11%, 即係11蚊, 只羅89%, 即係89蚊出黎派彩,
未賭已經輸左11%, 你話點會唔十賭九輸呀!!


讓球 (亞洲盤)

同主客和一樣, 不過只得兩個賠率, 由於得兩個賠率, 較為"礙眼", 一般食水唔敢太深,
不過現在澳彩亦逐步將派彩下調. 呢個彩池, 要留意唔同場數會有唔同既派彩率.

以香港賽馬會為例.

例一
馬德里體育會 [0 / -0.5] 對 拉科魯尼亞 [0 / +0.5]
1.88 ----- 對 ------ 1.99

派彩率計算
1/(1/主+1/客)
=1/(1/1.86+1/1.99)
=96.14%

例二
海倫芬 [0 / +0.5] 對 阿積士 [0 / -0.5]
1.85 ----- 對 ------ 1.90

派彩率計算
1/(1/主+1/客)
=1/(1/1.85+1/1.90)
=93.73%

即係話, 你買一百蚊, 無論你係買主或者買客都好,
馬會將會收起3.86%-6.27%, 只羅93.7-96.14%出黎派彩,
未賭已經輸左3-6蚊, 你話多唔多見仁見智.


入球單雙/入球大細

因為選擇唔多, 庒家不敢將賠率做得太低.

派彩率計算
1(1/1.85+1/1.85)
=92.5%

呢度可以留意, 派彩率係92.5%, 唔係85%, 以你既角度, 100蚊係贏85蚊,
以庒家角度, 佢係將全部投注先抽水7.5%, 總彩池既92.5%作派彩, 假設你贏,
你可獲得$92.5 x 2 既派彩, 等於185蚊, 明未?
所以你可以想像你係處於一個幾不利既位置.


半全場

半全場因為選擇多, 變相庒家可以分散視線, 將賠率做低.

派彩率計算
1(1/a+1/b+1/c+1/d....)
a-d 係所有選擇賠率.
=大約79.7%

簡單啲講, 即係係話, 你買一百蚊, 馬會會收起左$20.3, 只用79.7作派彩.


全場總入球

因為選擇多, 一樣將賠率做低.

派彩率計算
1(1/a+1/b+1/c+1/d....)
a-d 係所有選擇賠率.
=大約77.0%

簡單啲講, 即係係話, 你買一百蚊, 馬會會收起左$23, 只用$77作派彩.


波膽

波膽因為選擇多, 唔多覺, 食水食到"阿媽都唔認得"!

派彩率計算
1(1/a+1/b+1/c+1/d....)
a-d 係所有選擇賠率.
=大約66%

恐怖, 即係話, 你買一百蚊, 馬會已經收起左你34蚊,
所以買波膽, 玩玩下10蚊20蚊可以...


首名入球

首名入球選擇更多, 庒家更加可以魚目混珠地將賠率壓得更底, 食水食到"阿媽都唔認得"!

派彩率計算
1(1/a+1/b+1/c+1/d....)
a-d 係所有選擇賠率.
=大約54.4%

恐怖, 即係話, 你買一百蚊, 馬會已經收起左你45.6蚊, 只有54.4作派彩, 問你驚唔驚?


所有冠軍

冠軍選擇多, 庒家可以將賠率壓得底

派彩率計算
1(1/a+1/b+1/c+1/d....)
a-d 係所有選擇賠率.
=85.1%

庒家收起$15.0, 而有$85作派彩

【投資足彩入門】之二 (寫於2006年1月31日)

選擇彩池

從第一章, 我地認識到唔同既彩池, 有唔同既派彩率, 亦即唔同既抽水情況,
總括如下(派彩率由高至低為),

讓球 (亞洲盤) 派彩率 93.73-96.14%

入球單雙/入球大細 派彩率 92.5%

主客和 (標準盤) 派彩率 89.03%

所有冠軍 派彩率 85.0%

半全場 派彩率 79.7%

全場總入球 派彩率 77.0%

波膽 派彩率 66.0%

首名入球 派彩率 54.4%


如果當你睇倒入球單雙/入球大細1.85 vs 1.85, 已經係排第二高派彩率,
可能你會更加明白自己處於一個甚麼位置.

亦解釋左點解十賭九輸呢個不變既道理. 各位買波既時候, 尤其係諗住博殺大注之前,
記住先入一入黎, 睇一睇你所投注既彩池, 再考慮應唔應該咁做.

從以上所睇, 最有機會獲得回報, 係食水率最淺既讓球(亞洲盤).
不過千萬不要以為容易, 你要去克服既, 係3.76%既抽水率,
至於其他既彩池, 如波膽, 首名入球, 全場總入球呀等等臨臨種種,
你話10蚊20蚊玩下無所謂, 不過對於職業或投注專家來講, 都係抱敬而遠之
既態度.
至於讓球(亞洲盤)呢個彩池得兩個選擇, 上盤或下盤(讓球同受讓),
究竟如何透過計算, 如何為之值博, 如何去選擇盤路, 將於下回解說.

【投資足彩入門】之三 (寫於2006年2月7日)

選擇盤路篇 -- 讓球(亞洲盤)

第二章我們提及到, 從科學運算的角度, 最大機會獲得回報的彩池, 屬於食水最淺的讓球(亞洲盤).
相對派彩率係最高, 有93.73-96.14%, 但是雖然只有兩個選擇, 讓球方 及 受讓方, 要如何選擇及其中攝及的運算卻是高深的學問.

首先要讓各位明白, 世上無話一定贏的波路, 講出黎既都係呃你. 坊間亦有唔少所謂 "賭博天書" 買幾十蚊本, 睇過都係發覺呃錢, 缺乏數據支持. 這裡的見解及分析, 好肯定係獨一無二. 後面有冇來者唔知, 不過一定前無故人提出過. 在此與各位一同分享. 不過在此再一次聲明所有有關內容, 未經作者同意, 不能轉載, 取用, 分享或作任何形式的商業用途, 違者必究.


輪盤理論

各位都知道, 輪盤有 1-36 個號碼, 再加一個 0 號. (部份輪盤有埋 00 號).
基本上你買 大(19-36) 細(1-18), 紅色黑色, 機會都係 18/37 = 48.65%. 好多人鍾意玩輪盤, 因為佢 派彩率 較高, 有 36/37 = 97.30%.
從科學既角度去睇, 買輪盤, 假設長買 紅色, 理論上買37次, 你會中18次, 長買多數會輸, 因為你冇得計數, 開紅開黑每次隨機.

不過買讓球(亞洲盤)你就可以透過運算去增加你的得勝率. 道理好簡單, 舉個例, 假設有個輪盤係有10格, 6格紅, 4格黑, 你估買100局紅色, 你有冇錢可以贏? 答案不言而語. 當然, 賭博冇話一定贏, 就算係6格紅既輪盤, 你去買紅色, 一樣有40%你會輸錢, 不過如果長買既話, 根據理論, 應有合理既增長. 當然點樣去搵出 "不平衡既輪盤", 而又投注到正確既顏色, 又係另一個故事.

再者, 讓球(亞洲盤) 既高水低水, 由1.75 到 2.15 既賠率都會影響到實際值博率. 當然呢個因素亦會容後計算在內.


理論篇

要選擇 讓球(亞洲盤), 第一樣要知道既, 就係 主客和 既百分比. 呢個百分比 並唔難去計算.
世界權威賭博網站, 如 ladbrokes, williamhill 等, 都有專人隊伍, 每日長時間透過分析, 歷史數據, 對賽成績, 主客場, 受傷球員, 聯賽形勢等資料, 去運算出每場比賽既 主客和 賠率. 一般澳彩, 香港賽馬會等都會參照他們既賠率去開盤, 不過唔同既係, 澳彩及香港賽馬會, 會因應投注額側重而跳盤 (賠率浮動變熱變冷), 而世界權威賭博網站則甚少會有賠率浮動. 而透過呢個賠率, 我地可以計算出 主客和 既百分比, 方法如下.

主客和 百分比計算

例
埃及 對 塞內加爾
主 1.9 和 3.1 客 3.6

主贏百分比
=(1/主)/(1/主+1/和+1/客)
=(1/1.9)/(1/1.9+1/3.1+1/3.6)
=46.71%

和百分比
=(1/和)/(1/主+1/和+1/客)
=(1/3.1)/(1/1.9+1/3.1+1/3.6)
=28.63%

客贏百分比
=(1/客)/(1/主+1/和+1/客)
=(1/3.6)/(1/1.9+1/3.1+1/3.6)
=24.65%

3個百分比加埋一定係100%. 由此可知, 主隊贏係46.71%, 和波係28.63%, 客隊贏則是24.65%.


主客和 百分比與 讓球(亞洲盤)的關係

一般來說 主客和 中較熱門的一方, 係同 讓球(亞洲盤) 有非常密切既關係. 課餘知識讓各位知道. 詳細如下:

主客和 較熱一方賠率

2.3 -- 2.6 賠 --> 平手盤
1.9 -- 2.3 賠 --> 平半盤
1.7 -- 1.9 賠 --> 半球盤
1.6 -- 1.7 賠 --> 半一盤
1.45 -- 1.6 賠 --> 一球盤
1.35 -- 1.45 賠 --> 一球球半盤
1.25 -- 1.35 賠 --> 球半盤
1.15 -- 1.25 賠 --> 球半兩球盤
1.05 -- 1.15 賠 --> 兩球盤

兩球或以上已經係甚少, 亦都缺乏研究價值. 一般來講, 九成半以上既盤口都會參照以上圖表出盤.

至於每個唔同既盤口既 贏輸比率, 以及佢地配合唔同水位既 回報率, 將於下回續一分解.

【投資足彩入門】之四 (寫於2006年3月19日)

實戰篇 -- 讓球(亞洲盤)

第三章我們提及到 輪盤理論 及 主客和百分比, 呢個章節將會集中 如何找出 "不平衡輪盤", 及分析邊個盤係值博. 不過最後各位會發現, 可能喺100個盤口裡面, 只有5-10個盤係值博, 亦解釋左點解 "十賭九輸" 及 博彩公司長贏既現象.

平手盤

最簡易不過既盤口, 純粹係比較 主隊勝 同 客隊勝 既機會邊個大啲. 如何知道值唔值博? 我們無論任何情況, 只須留意 理論回報.

理論回報 = 機會率 x 賠率
只要 理論回報 大過100% = 抵買, 數值越大越好.
相反 理論回報 少於100% = 唔抵買, 數值越少越蝕水.


舉一例:
一個 輪盤 有四格, 3格黑色, 1格紅色.
中黑色既 機會率 係 75%, 紅色既 機會率 25%.
如果問你 買紅色 值唔值博?

答案係 唔知, 因為我地 並唔知道 買紅色既 賠率,
假設買紅色既 賠率係 2 賠, 理論回報 = 25% x 2 = 50% = 唔抵買
假設買紅色既 賠率係 5 賠, 理論回報 = 25% x 5 = 125% = 抵買

道理就係咁簡單, 明未?

實例:
2006 年 3 月 19 日
艾克馬亞 vs 飛燕諾 主客和 (標準盤)
主 2.23 和 3.65 客 2.55

主贏百分比
=(1/主)/(1/主+1/和+1/客)
=(1/2.23)/(1/2.23+1/3.65+1/2.55)
=40.23%

和百分比
=(1/和)/(1/主+1/和+1/客)
=(1/3.65)/(1/2.23+1/3.65+1/2.55)
=24.58%

客贏百分比
=(1/客)/(1/主+1/和+1/客)
=(1/2.55)/(1/2.23+1/3.65+1/2.55)
=35.18%

而讓球(亞洲盤) 係平手盤
艾克馬亞 vs 飛燕諾
主 1.925 客 1.925

首先計算主隊既 理論回報,
假設你買 100 次, 你有 40.23 次贏, 賠率係 1.925 賠, 即係收 77.44,
另外有 24.58 次 走盤, 即係收 24.58,
共收 77.44 + 24.58 = 102.02% 比 100%大, 買主隊抵買.

反之如果你買 100 次 客隊, 理論回報,
35.18 次 贏, 賠率係 1.925 賠, 即係收 67.72,
另外有 24.58 次 走盤, 即係收 24.58,
共收 67.72 + 24.58 = 92.30% 比 100%少, 理論係長買長輸.

結果
艾克馬亞 1 : 0 飛燕諾. 當然唔係話實贏, 只係經呢個方法令各位命中率提升, 買邊一場,
理論上係可以慢慢 提升你既賭本.

而其餘既盤口, 如平半, 半球, 半一等等亦係用類似方法計算出來, 可能須要下回再分解啦.

【投資足彩入門】之五 (寫於2007年10月24日)

實戰篇 -- 讓球(亞洲盤)

第四章我們提及到 理論回報 決定賽事的值博與否, 並分析了平手盤的計法, 本章將會分析 平半盤 及 半球盤 的計算方法.

平半盤

其實 平半盤 的意思, 亦將你的投注均分為二注, 一注是平手盤, 另一注是半球盤. 要分析 平半盤, 同一道理, 我們都是看兩隊球隊的 理論回報, 如果計算出來有一方理論回報, 大於 100% 為值博, 如兩方均小於 100% (亦係大部份情況) 則為不值博的賽事.

實例:
2007 年 10 月 24 日
布里斯托城 對 修咸頓 主客和 (標準盤)
主 1.9 和 3.2 客 3.5

主贏百分比
=(1/主)/(1/主+1/和+1/客)
=(1/1.9)/(1/1.9+1/3.2+1/3.5)
=46.8%

和百分比
=(1/和)/(1/主+1/和+1/客)
=(1/3.2)/(1/1.9+1/3.2+1/3.5)
=27.79%

客贏百分比
=(1/客)/(1/主+1/和+1/客)
=(1/3.5)/(1/1.9+1/3.2+1/3.5)
=25.41%

而讓球(亞洲盤) 係 平半盤
布里斯托城 [0 / -0.5] 對 修咸頓 [0 / +0.5]
主 1.9 客 1.94

首先計算主隊既 理論回報,
假設你買 100 次, 你有 46.8 次贏, 賠率係 1.9 賠, 即係收 88.92,
另外有 27.79 次 走盤, 輸半個盤, 即係收 13.9,
共收 88.92 + 13.9 = 102.82% 比 100%大, 買主隊抵買.

反之如果你買 100 次 客隊, 理論回報,
25.41 次 贏, 賠率係 1.94 賠, 即係收 49.3,
另外有 27.79 次 和, 贏半個盤, 即係收 40.9,
共收 49.3 + 40.9 = 90.2% 比 100%少, 理論係長買長輸.


半球盤

半球盤 更加簡單, 即讓球一方必須要贏球, 才有錢贏, 而受讓一方焦論打和或勝出均當勝出論. 要分析 半球盤, 一樣是看兩隊球隊的 理論回報, 如果計算出來有一方理論回報, 大於 100% 為值博, 如兩方均小於 100% (亦係大部份情況) 則為不值博的賽事.

實例:
2007 年 10 月 25 日
雲達不萊梅 對 拉素 主客和 (標準盤)
主 1.83 和 3.2 客 3.75

主贏百分比
=(1/主)/(1/主+1/和+1/客)
=(1/1.83)/(1/1.83+1/3.2+1/3.75)
=48.55%

和百分比
=(1/和)/(1/主+1/和+1/客)
=(1/3.2)/(1/1.83+1/3.2+1/3.75)
=27.76%

客贏百分比
=(1/客)/(1/主+1/和+1/客)
=(1/3.75)/(1/1.83+1/3.2+1/3.75)
=23.69%

而讓球(亞洲盤) 係 平半盤
雲達不萊梅 [-0.5] 對 拉素 [+0.5]
主 1.76 客 2.09

首先計算主隊既 理論回報,
假設你買 100 次, 你有 48.55 次贏, 賠率係 1.76 賠, 即係收 85.44,
共收 85.44 = 85.44% 比 100% 少, 買主隊不值博.

反之如果你買 100 次 客隊, 理論回報,
23.69 次 贏, 賠率係 2.09 賠, 即係收 49.51,
另外有 27.76 次 和, 一樣贏足盤, 賠率係 2.09 賠, 即係收 58.02,
共收 49.51 + 58.02 = 107.53% 比 100% 多, 此 理論回報 屬於非常抵買.

我至今都輸左40蚊

支持Jaypoon！支持精華！

原來足彩係咁投資既... 真係令我地d 窮學生大開眼界

真係唔識...

當學野^^
thanks jay!!!

睇完都仲係有d唔明=.="
不過都好多謝jay

還有下文嗎??????

賭錢賭到咁專業真係幾恐怖

好彩我不嬲都係玩幾廿蚊助下慶姐

支持~
呢排輸到甩褲...
多謝jay兄~

下面是引用kch於06-02-2006 21:08發表的:
還有下文嗎??????

當然有啦.