攪左成晚………
事綠尋晚番黎，原本諗住用個擦擦下缸邊d啡苔。呢排係咁爆苔，日日都爆到飛起。
點知擦到角落頭……一條黑影閃出黎……哎呀，原來隻山羊「lee」左係到，我唔覺意擦到佢。開頭以為無咩野。但睇清楚，發覺成條魚側身紅哂……原來個擦好硬好粗，成個百潔布咁，輕輕「high」到都整傷條魚。開頭仲心存妄想……諗住或者會無事架。但幾分鐘後，條魚已經開始游背泳……死得。
跟住先後悔頭先無即時決斷地撈佢上黎。佢游到入d生物石入面就失左蹤。我知到今次大鑊！佢死鬼左既話，一開始腐爛，會產生大量no2，到時缸水實反！夜得滯無計，只好等第二朝希望佢條屍會自動蒲頭。
今朝一睇……無！搵勻成個缸都無！今次麻煩。唯有放工先算。放工五點幾飛番屋企，諗住反轉個缸都一定要搵條屍出黎……抄下又一舊石，抄下又一舊石……竟然屍骨全無………死火啦，去邊呢？一晚之間無可能咁快化哂成條魚架………但真係成個缸d石都搬哂出黎，真係無！又唔敢反沙！一反沙d水實死硬。只好又搬番d石入去……
搬唔夠兩舊，突然見到一舊三角形物體飄飄下……呀……終於搵到啦………
不過，已經得番個魚頭，仲係得番骨既魚頭………成條魚唔知比邊隻衰野連骨都食埋………
無啦，唯有砌番好d石……但搬出黎易，砌番佢難，砌黎砌去都唔似樣，又攪左個個鐘。如是者，頭頭尾尾兩個鐘先攪掂………成缸水已經比我攪到………
即刻開番哂d器材。又夠哂鐘要出去食飯……無計。唯有翻黎先算。十一點幾番到黎，即刻測試d水質……果然無估錯……no2爆哂，兩朶葵縮到原來既三分一……兩隻尋晚買既醫生蝦死左一隻（仲係隔離缸都未入去架……）一條新入缸既小丑起哂白點…………心知大鑊……
咩都唔駛講，即刻換水。換左15%到既水……又攪左兩個鐘。再落番d硝化細菌……可以做既都做哂……宜家只可以聽天由命………
若然阻止唔到水質變壞………咁反缸機會好大。即係呢一個月黎既心血一鋪清袋。又要由頭養水養番一個月……
真係一子錯……我只係想擦擦個缸邊者………點知會攪成咁………
[ 此貼被freezefox在2006-01-28 03:29重新編輯 ]
