【Viu 開台劇】描述同志伴侶夠生活化受讚 保怡做「離地」的士大佬
噚晚ViuTV嘅開台劇《瑪嘉烈與大衛．綠豆》首播，劇集放喺11點播已經好破格，林保怡同周家怡呢個配搭亦都算新鮮，不過劇情方面就似乎平淡同節奏慢咗少少，同埋有網民話林保怡個的士司機角色都幾「離地」，大多數人心目中嘅的士司機都幾「健談」，但林保怡就斯斯文文之餘，仲幾文青Feel，佢屋企嘅裝飾仲要勁簡約「無印feel」，真係想像唔到係一般的士司機嘅屋企。
至於攞嘅角度用色調，都同無綫好唔同，而最破格嘅係，噚晚一集林保怡載咗一對男同志伴侶，用嚟跟林保怡同周家怡嘅關係對照，兩位男同志喺的士上面嗌交，成個劇情對佢哋嘅描述跟一般異性戀無異，都會為同唔同居煩惱，都要為搵食呢個問題嗌交，另外多咗一樣，就係出唔出櫃嘅煩惱，之後兩人仲係車廂外擁抱。比起以往於無綫，大部份同性戀角色唔係「camp camp哋」將佢喜劇化處理，就係「心理變態」等不正常角色，喺同志角色方面嘅描寫，ViuTV簡直係大躍進。
連電影人舒琪睇完，雖然話部劇有少少「偽中產」feel，不過佢話:「《大衛與瑪嘉烈》有啲偽中產吧（林保怡的的士司機之家，真叫人羨慕啊！），但中間一段用一對同志的感情來映照直couple主角的關係，卻起碼是香港電視史上難得一見（如果不是第一次的話）的處理。」
不過咁樣嘅小品，節奏咁慢，又成11點播，應該都唔係特別想吸師奶觀眾，唔知留唔留到一班後生又上網睇開劇嘅後生呢?
至於早前於《瑪嘉烈與大衛》系列被保怡易角嘅邵仲衡喺FB大方讚保怡靚仔，又Whatsapp回覆本報話：「真心話，香港極需要多個電視台，望他們好，支持他們的。」
http://hk.apple.nextmedia.com/enews/realtime/20160412/54977274
