一日之計在於晨
34 mins ·
銀牌球王的勝利
相信你同我都為李宗偉感到可惜。拳怕少壯，畢竟三十四歲高齡對住一個強勁的後起之秀加上尋晚場世紀之戰勞損，今日中段已經力不從心。痛失金牌當然失落，但作為一個人，李宗偉的人生已經非常圓滿。
1. 首先揾到自己最擅長的一門技能
2. 之後人生有咗個傾盡全力的目標
3. 然後努力得到回報攀上世界最高峰
4. 再喺山頂遇到個宿敵
5. 依個宿敵同樣視你為宿敵
6. 二人不斷修行鬥足十年
7. 喺可能最後一場比試勝出
8. 最後俾個新星打敗
9. 做一個永遠的銀牌球王
10.嗰邊仲輸埋個銅牌，雙雙飲恨
成個路線圖充滿戲劇性，做人做到咁其實已經無憾。人人都話比達好可憐，明明係撒亞人王子，資質好又勤力，但永遠唔夠悟空依個野仔打，無論幾努力都事與願違。但所謂無敵是最寂寞，我認為做阿二有做阿二好，因為排第二，個世界就有一個你值得追趕的目標，依個目標能夠令你目空一切咁去努力。好似加賀咁，有架值得瘋狂追住的前車係一件幾咁開心的事。
李宗偉雖然世界排名第一，但林丹仍然係世人心目中係無敵。好多人會戥前者唔抵，但我估李宗偉其實已經好滿足，因為高手的世界已經超越咗本身個運動成就，真正追逐的係自己對嗰種運動意義。諶龍係金牌選手，但仲未去到林丹同李宗偉去到的境界。
.
能夠好努力好努力咁去做一樣嘢，已經係一件賞心樂事，再揾到一個同你一樣意向一樣目標一樣情措的人從競爭中不斷前進，嚟到最後依一站已經贏咗個世界。勝利，從來都係一條整數。
