謝拉傑:好彩賽後隊巴上古天奴IG報平安,無大礙。
今場真係好多機會俾人反勝......
(2017-05-02 09:39)
點都好。拎到呢3 分十分關鍵。壓力又去番其餘個三隊到。
講真,曼城就點睇都唔似會入唔到前四。佢剩番既對手都唔算咩強隊。水晶宮、李城、西布朗、屈福特。幾乎都係上哂岸等放假既球隊。四場入便仲要三場主場,你望曼城失分都真係有少少難度。最後都係睇住佢拎多10-12分,以76-78分既分數上番第三多架啦。
相反,阿仙奴同曼聯黎緊就已經要對戰。即係,意味住是旦一隊要失分了。甚至可能兩隊同時失分(呢個機會甚高)。曼聯個陣天殘地缺,同我地有得揮。仲要兼顧歐霸。無左拜利,好難唔失波。作客阿仙奴固然難打,但作客熱刺更加難打。我諗全世界都買佢呢場輸波咁滯。呢兩場之間仲要夾住兩場些路迪。打完呢兩場,可能都唔駛打剩番個兩場都已經知道結果了。假如黎緊兩場真係一和一負。咁之後兩場就算WIN 哂,曼聯都只有72分。比佢和到熱刺,都係73分。想爭前四,佢一定要嬴阿仙奴,拎到76分先有故仔講。
阿仙奴仲慘。宜家得60分。仲有五場波。要全勝,取得15分,加埋有75分先有機會爭入前四。和左曼聯既話,得番73分。隨時變梗頸五。其實真係曼聯呢關最難過。之後作客修咸頓同史篤城都應該唔係咩大問題。主場對新特蘭更加係食硬(當然,世事難料)。最擔心既,頂多係尾場主場對愛華頓。一個唔該,比佢迫和,咁就算之前真係嬴左曼聯都會因為呢場波陰溝裡翻船。
利記仲有三場,兩主一客。修頓、西咸、米鋪。無一隊難打。但講利記唔係睇對手係邊個。利記個問題係係自己身上。古天奴傷勢唔嚴重但都可能要倦勤。唯一進攻核心都無埋,你都唔知隊波可以點攻。唔係次次都有運的。高普手上兵源所剩無幾。三場波隨時有兩場失分。咁就就算對手點失分都無補於事。利記宜家有69分。距離76分仲差7分。即係,最好當然兩勝一和(唔好講全勝了……心照啦)。你話一個唔該,和左兩場,得番5分,加埋先得74分。咁就又要聽天由命了。
三場和哂咁點?咁你都唔好意思講前四啦…………