拍新劇搞援交
杏兒睇蒼井空 AV取經
胡杏兒、陳鍵鋒昨日以一身酒店職員打扮，到佐敦一間酒店拍攝節目巡禮宣傳片，以作新劇宣傳之用。在新劇中杏兒飾演一名援交少女，宣傳片的劇情則是講她到酒店與麥長青作性交易，但交易卻因豬流感爆發要封酒店，杏兒想逃走時推跌麥長青而令他暈倒，並誤以為殺了他，最後由陳鍵鋒協助下逃走，對於要演援交女，杏兒說：「啲打扮都幾性感， deep V、漁網襪同濃妝。」問到她會否挑戰陳法拉早前除剩胸圍的尺度？杏兒說：「劇情需要可以考慮，唔好係賣弄性感。」
笑容相似身材難敵
早前與杏兒十分似樣的日本 AV女優蒼井空訪港，杏兒指早聽過她名字，她說：「朋友之前有 send過相畀我睇，我身材冇佢咁好，笑起嚟真係有啲似，但佢身材好過我。」
當記者提議二人飾演姊妹，杏兒搞笑地說：「 AV我拍唔到，拍劇同電影都 OK。」蒼井空於訪問時，在鄭嘉穎、陳鍵鋒、林峯、吳卓羲及黃宗澤中揀選了鄭嘉穎，杏兒即哈哈大笑：「佢識揀喎。」
「睇吓又唔係犯法」
最後問杏兒敢不敢看蒼井空的作品，她說：「我唔介意睇，睇吓又唔係犯法。」陳鍵鋒則笑言蒼井空選擇錯誤，他說：「佢應該揀我啦，不過我唔知佢同杏兒似樣，我冇睇過佢嘅演出。」
此外，陳鍵鋒前晚與楊思琦在尖沙嘴拍攝無綫新劇《翻叮一族》外景，其間思琦不停向記者擠眉弄眼，原來她不慎弄掉隱形眼鏡，導致眼部不適不停眨眼。
採訪：何永寧
攝影：林德雄
