切塞納繼續神奇 聘港籍神秘領隊
[好友意甲新聞台] 神奇球隊切塞納升班之後, 繼續維持神奇本色. 球隊竟然從十萬八千里遠嘅香港搵黎二十出頭, 喺球壇上名不經傳嘅露宿漢sam出任領隊. 呢個委任亦已喺今日獲賽會接納. 此一舉動當然引黎全意大利球壇嘩然, 甚至有人拎呢件事黎同英超球隊曼聯引入bebe一事相提並論.
切塞納今日召開記者會公布呢個消息, 當然sam亦有出席. 席間sam顯得相當輕鬆, 妙語如珠, 似乎並未有受太大壓力. 有記者問到, 年齡會唔會成為佢帶隊嘅障礙, 領隊表示, 絕對唔係問題: "以我呢個年紀, 相信可以同成班球員玩得更close, 踢波最緊要開心, 開心就會踢得好, 所以我會覺得, 年紀細不但唔會係障礙, 更加可能係一個好處黎添~~"
眾所周知, 其實班主, 以至成個城市嘅居民, 都覺得今年係志在參與. 領隊亦唔例外. "我都認同今年會係抱住一個志在參與嘅心態黎玩, 不過, 如果一路包艇又或者長期喺榜末位置徘徊, 又算咩"參與"呢?"
被問到佢心目中球隊嘅踢法, 領隊更有以下妙答. "我自細隔離屋就住著一個學廚嘅, 而我有同佢好friend, 所以我成日過去玩, 成日見到佢切菜, 好細個已經偷師, 學習當中技巧. 後來, 我自己慢慢開始鍾意食沙律, 咁自己整沙律嘅時候, 亦都有好多切菜嘅機會. (現場所見, 記者們大都一頭霧水) 帶一隊波其實就好似整一盤沙律一樣, 最緊要識得點切菜, 將聯賽嘅對手當正係菜一樣咁切. 以最適當嘅方法去切, 就能夠達到想要嘅效果, 有時d野, 其實就係咁簡單. 我好相信, 對住可能係全球最勁嘅菜 - 巴塞 - 呢個做法亦會一樣成功.
我亦已經同隊入面嘅球員, 進行過文化交流 - 請教過意大利呢度好出名嘅檻欖油同沙律醋嘅應用, 又已經將廣東話"切菜"嘅意義, 同埋"切菜"同切塞納"嘅關係, 與球員們分享左 - 所以大家都明白, 亦都相當有信心, 來季可以做出好成績." 有記者問到, 究竟帶波同切菜有邊一度相似, 其他球隊又如何會似一棵菜, 領隊就好有經驗咁答: "呢個涉及到我隊嘅戰術安排, 我唔方便喺呢度公開同大家分享, 真係好對唔住."
照咁睇黎, 呢隊意甲新丁都幾令人期待. 希望之後都有其他隊伍嘅領隊肯出席記者會, 接受傳媒嘅訪問啦~~
