【新增大會回應】韓國年度樂壇盛事《MAMA音樂頒獎禮》將於明晚喺香港亞博館舉行，多達逾50位韓星今日就陸續由韓國飛抵香港作準備，包括「青龍影帝」李秉憲、河智苑、韓劇《雲畫的月光》朴寶劍及金裕貞、型男車勝元、女團TWICE、少女時代隊長泰妍等人，吸引過200粉絲去接機，佢哋更企喺對面馬路及樓上等見偶像。
今日打頭陣c就係男歌手Zico，佢於約12點半現身，身穿米黃色衫戴帽，低頭快步上車，似乎好攰咁。之後就係演員李智雅，約12點35分戴住黑超現身，都有對住鏡頭微笑。
女團GFriend就於12點43分現身，6位成員有向對面粉絲揮手，而粉絲用韓文大叫「我愛你」，其後分兩部車離開。而I.O.I 11位成員約12點55分現身，由Somi帶頭步出接機大堂，都好nice咁向粉絲揮手打招呼示意，不過有粉絲從旁邊突然出現，想逼上前更加近距離見I.O.I，被保安阻止。
TWICE就於1點11分左右現身，由Sana帶頭，粉絲立即尖叫歡迎，大叫成員名時，佢哋都有揮手回應，上車後更掀開窗簾見粉絲。今次係自年初TWICE台灣成員周子瑜捲入「台獨風波」後，子瑜後首次來港，不過佢現身時表情似乎有啲呆，可能係因為太攰？TWICE抵港後即撲去亞博館進行綵排，到下午近4時佢哋完成綵排就返回下榻W酒店，現場都有成20-30名粉絲等候。而台灣傳媒就指上月有傳大陸粉絲將會喺《MAMA》現場策劃喺現場襲擊子瑜，有可能丟雞蛋或潑糞攻擊，但大陸網民就話呢啲傳聞只係從台灣傳出，佢哋未有襲擊子瑜打算，鬧出羅生門。對於有襲擊傳聞，《MAMA》大會表示得知事情，現場將會加強保安，有須要更會與警方聯絡。
男團MONSTA X於下午近2時抵港，之後就到早前宣佈與女團Crayon Pop25歲成員昭燏明年結婚元祖男團H.O.T前隊長文熙俊抵港，擔任紅地毯司儀文熙俊與拍檔女星申雅英約於兩點一同現身，文熙俊包到實，二人分兩架車離開。
而河智苑今日於仁川機場出發時就戴上墨鏡，非常霸氣、子瑜今日就未有穿上短裙或短褲騷腿，反而泰妍就大方騷腿，非常養眼。
另外，韓劇《她很漂亮》黃靜茵落實擔任《MAMA》頒獎嘉賓，跟舊拍檔朴敘俊合體亮相，而男團EXO亦透露明日於騷上有特別演出。
http://hk.apple.nextmedia.com/enews/realtime/20161201/55989215 [ 此帖被羅力亞在2016-12-01 22:04重新編輯 ]
