英超終於開鑼，幾支強隊嘅表現都幾大分別。最最最失望一定係雲高爾領軍嘅曼聯，雖然好多傷兵，令戰術大師冇幾多個球員可用，但令人失望嘅唔單止係輸波，而係進攻又好似上季咁，集中埋一邊，好似想嚟多次「9981斬」咁，而且防守真係好唔穩陣。好彩啱啱買咗喺世盃踢得唔錯嘅馬高斯盧祖，希望會有幫助啦！至於曼城，就一向咁穩定，小勝紐卡素。利物浦嘅新中堅洛夫雲，靚仔之餘踢波一樣掂，紅軍今次真係冇入錯貨。講到我愛隊阿仙奴，就贏得險少少，補時先靠艾朗藍斯入波，希望「死神」今年健健康康，向住冠軍衝呀衝！不過，雲格可唔可以簽多個前鋒呢？因為基奧特真係好似後備啱數啲囉！車路士呢，上場對般尼贏得好，最令我意外係新球員迪亞高哥斯達同法比仔都踢得好好。法比仔喺巴塞硬係好似爭啲咁，估唔到嚟到車仔有番以前喺阿仙奴嘅水平，我祝呢位前廠長前程似錦，所謂分手都係朋友，一切就在心中啦！
今個星期我就睇好車路士[-2]都贏「狐狸」李斯特城，車仔不論人腳、領隊到士氣都比李城高太多，而且我估迪亞高哥斯達會繼續入波，不防買埋「首球」！
LULU
不懂踢波愛睇波
