【書展專題】網絡女神殺入書展
杜小喬 Pure 戰肉彈 
杜小喬首次推出相集，笑稱性感與自己大纜扯唔埋。 【香港書展2O16】書展將於本周三在會展開鑼，除了 35E 導彈莊端兒等性感寫真爭客外，網絡女神「娘娘」杜小喬、毛記主播盤菜瑩子和專家 Dickson 都加入書展戰，用文字和相集洗滌大家心靈。
因被「熊仔頭」邀拍片《男人有話兒2》紅遍網絡，成為高登女神的 26 歲「娘娘」杜小喬，推出處女相集《Little Bridge》，日前她在觀塘接受專訪，問到是否覺得自己靚女所以出相集？小喬說：「我啲相因為冇乜執樣，所以好多瑕疵，我覺得攝影師最叻，將一個好似我咁又唔係真係好靚，普普通通既女仔，影到個 feel 懶有仙氣。」
拍寫真時杜小喬稱因女攝影師才夠膽穿短褲。 小喬坦言相集零性感：「賣點係乜都冇露，有輯相喺室內影，係女攝影師，我先夠膽著短褲，高登形容我係 LETV ──冇波睇，我覺得好開心，睇我既人 expect 咗有乜得到，唔係身材唔係事業線亦唔係長腿，係一個 feel。」
問到現在有否男友？她坦言：「冇，好想要！條件係孝順得黎要好錫女朋友，大家溝通得到，自己係雙子座有時講嘢太跳 tone，如果果個人接到你既波，呢個係外在條件。」游學修和劉鳴煒兩個 package，鍾意哪個？她說：「如果真係要揀，我諗我會揀個認識既人──游學修，純粹因為我識佢。」
對於有傳收兵無數，小喬說：「兵黎講係傳聞，杜小喬喺人哋眼中係娘娘，但我實際上係宅女，13 歲開始拍拖，拍過兩次啫，一個 10 年以上，一個識咗 8 年，佢哋都話識咗我咁耐，但好多嘢唔知！好期待有一個人，可以令我將所有嘢話畀佢知！」
書名：《Little Bridge》價錢：$138
