袁澧林（Angela）
年齡：22歲
身高：170cm
體重：52kg
ViuTV 節目：ViuTV 開台宣傳片、《三一如三》（未播）
身高有 170cm 的袁澧林（Angela）年紀輕輕只有 22 歲，與陳瀅和王宗堯前度女友黎紀君屬同一間模特兒公司，去年拍美心賀年廣告而有「美心少女」稱號。上月 ViuTV 開台，大膽起用零拍劇經驗的 Angela 擔正做宣傳片女主角，清新面孔瞬間被網民起底，令 Angela 的 facebook 在一夜間急增逾萬「朋友」。Angela 日前在銅鑼灣受訪直言受寵若驚，她說：「條宣傳片每日起碼播 5、6 次，好多人留言話日日睇，自己都超級驚喜。」
怎樣看「文青女神」這個封號？Angela 說：「啲人覺得我文青，可能因為我著衫好簡潔或者好有書卷味；而我見過自己覺得最文青既人，其實係一個爛佬咁，但佢睇好多書，識寫詩、識音樂，寫影評。我係咪女神？呢個問題真係難答，王菲、姬拉麗莉（Keira Knightley）同愛瑪屈臣（Emma Watson）都係我女神，我覺得我一定未去到果個 level 喇！」
Angela 謙虛說自己未達女神級數，但好多男粉絲都讚她好「gfable」，Angela 好奇地問：「Gfable 係咪一定要順人意、嬌滴滴好聽話咁樣？我個人其實好男仔頭，唔一定要著到好靚先出街，手袋要人地幫我拎，我就唔係果啲人。」Angela 揀男友首要條件是夠成熟，打機、打波甚至「毒男」這類港女嫌棄的惡習，她都接受，Angela 說：「我唔會特別畀一個靚仔吸引住，就算『高登仔』都可以有唔同性格，我由細到大都知道上高登啲人係好叻既，呢個真既。」問到現在有沒有男朋友？Angela 一臉羞怯地謂：「呀……有既，哈哈，但又唔係拍咗好耐。」她自覺是一個獨立女性，但間中都會嗲男友，她說：「覺得好安全或受保護時，自然就會好開心。」
別看 Angela 外表斯斯文文，其實膽子好大，上年暑期曾經一個人揹住背囊去埃及個半月做交流生，當時還遇上不愉快經歷，她說：「其實去之前都好驚，因為好多地方發生爆炸。加上係旅遊淡季，當地人啱啱完咗齋戒期，一個黃皮膚喺街上好危險。我試過行街突然成班人衝埋黎同我合照，有啲人搭膊頭或尷尬部位（背部胸邊位置）。」Angela 還計劃去印度旅行，問到父母有沒有阻止？她笑說：「佢地阻止唔到我。」
Angela 是個不愛束縛的人，六四集會、七一遊行、反新界東北發展遊行都曾經參與，她解釋：「每個人去都有唔同原因，近年啲人希望將六四集會轉化成新希望，而我係為悼念亡魂，犧牲咗既人，自己睇到覺得好痛苦。而參與七一，有啲人好理性，有啲人為咗一個目的，有啲人好 emotional，唔滿意現狀都會去，係一個好大型活動，我上年都有參與。」
