林日曦
2 hrs ·
瞓咗兩粒鐘醒咗，因為有啲嘢想同大家講。
尋晚完Show，雖然真係好想返屋企，但都想去一去慶功宴盡量多謝所有為呢個Show付出過努力既人。
我當時係忍唔住，差不多同所有見到既朋友道歉，因為我哋做咗一個低於期望、好多甩轆兼非常冗長既Show出嚟，搞到悶親大家。佢哋都好好人，猛咁話點會呀，好正喎。而我知道，呢啲都係禮貌說話黎啫。
原先預計2小時30分既節目，嚴重Overrun到去3小時30分。我參與其中，點會唔知悶。各位花時間到現場同開電視睇我哋既觀眾，我想由衷地同你哋講一句，認真對唔住，對唔住。
個Show好多好多問題，亦出咗好多意外，其中一個最大問題，係Cue騷方面出現嚴重錯誤，場口之間連唔埋，令氣氛一高，又死寂三十秒，斷下斷下咁，現場還可以氣氛搭救，睇電視就係一場災難。Cue錯同連唔埋有好多意外原因，其中一個原因，就係好多影片都係最後一刻先Ready，搞到綵排時排唔到。點解啲片最後一刻先Ready，又係有好多原因，歸根究底，係我哋花咗太多時間去諗成個Show。講到尾，係我哋幾個負責去度既人既問題。
尋晚去逐一道歉時，肉肉麻麻尷尷尬尬咁，我係冇同班朝見口晚見面既同事講。但我心底裡其實最想同佢哋道歉，因為佢哋花咗好多心機、時間、汗水同眼淚去籌備、排練，但就因為我哋編排失當，搞到佢哋得唔到佢哋應得既一面倒讚賞，Sorry。
最後，衷心多謝所有喜歡呢個Show同埋唔喜歡呢個Show而真心畀意見我哋改善既觀眾。
而家係諗到乜就寫乜，冇乜上文下理。
冇咩事既話，我出返去試下瞓覺先。
[ 此帖被g3rMan在2016-05-12 12:38重新編輯 ]
