有幾點大家要攪清楚：
1. 「乘人之危」。
宜家夾硬將快開罰球同趁人受傷拉埋一齊黎講，唯一既「相關之處」，就係所謂「乘人之危」。呢個根本就係似是而非既講法。
首先，唔該你解釋下咩叫「乘人之危」？
左閘殺左上去進攻，返唔切回防，左路防線有漏動，算唔算乘人之危？------發神經！
有個球員打打下自己走左出去飲水，比人突破越位，算唔算乘人之危？-------低能！
人地打波你係到發夢，比人入左都唔知，算唔算乘人之危？-------------------去死啦！
人地射罰球，你無端端走去幫鞋帶，算唔算乘人之危？-----------------------你無野係話？
人地有球員受傷，行左出場外，十個打十一個，你繼續進攻，咁又點？----------咁梗係得啦！
以上種種，我地都唔會認為佢係「乘人之危」！係因為，我地係係認知既情況下作出有關行動！大家係「明知」既！事前得到通知既！你打波發夢，關人鬼事？你可以控制自已，唔發夢，遲d先幫鞋帶，唔會行左出場傾電話，唔會掛住同球迷揮手唔比賽！全部都係你自己可以控制既野！你唔控制，容許事件發生！點可以叫乘人之危？
人地快開罰球，一樣係咁者！邊個叫你發夢者？
但對方球員受傷，唔係「自己攞黎」，唔係自己可以控制既！受左傷，就要停止比賽，係所有球員既「共識」！你違反呢種社會大眾認同既共識，先叫「乘人之危」呀大佬！
你夾硬曲解「乘人之危」既意思，咁防守出現漏動唔通你君子到唔射波，叫佢補番位先，你再用技術過佢呀？
從來唔關係咪「球例容許」呢件事！係講緊社會大眾普遍共識呀！攪清楚個point先啦！
2. 「趁人唔為意」
大家又會將「乘人之危」簡單地歸納為「趁人唔為意」。首先，快開罰球就可以話「趁人唔為意」者？對手受傷關人地「為唔為意」咩事？對手訓低，你即時既「好處」係，人地少左個防守球員、越位位置可能被補、訓低既球員甚至可能阻礙防守球員防守，尤其係籠門………一大堆野，又豈止係「趁人唔為意」咁簡單！？
3. 保護球員！
呢點先係最最最關鍵既一點！而呢一點我見大家討論個陣，好少有人提到！點解對手受傷，我地要踢走個波？公平？呢個只係其中一個原因！更重要既原因，係我地要保護受傷既球員，以免佢再受到更大既傷害！
我地唔知訓低既人咩事。萬一係頸骨移位咁點算？骨折又點算？若然許容球賽繼續，係瘋狂既攻防中，受傷球員比人撞多兩野！咁點算？
所以，係對方球員受傷既情況下，我地繼續作賽！唔公平只係小事！我地好容易令受傷球員傷上加傷先係大事！尤其受傷球員係正你進攻既範圍。你唔停不特止，仲要踢個波埋去佢身邊，等其他球員一窩風咁湧埋佢到係咁踢係咁撞！出左事！邊個負責？係咪一句：「車！球例又無話唔比」就得？萬一佢真係傷上加傷，請問對方既良心可以安樂嗎？
若然可以既，呢d 球員，已經連基本既人性都無啦！仲講咩體育精神咁高既層次哎………
要咬，都睇下情況。唔好為咬而咬，將一d 基本既精神同價值觀扭曲先得架。呢類行為都可以被容許，被肯定，球壇仲會有希望既？
[ 本文被freezefox在2007-04-11 01:11重新編輯 ]
