KBS就晒《Producer》特登改節目時間表 孔孝真IG晒新相
韓國電視台KBS新劇《Producer》自確定有韓流男神金秀賢、「收視女王」孔孝真及笑星車太鉉等猛人主演後，韓國及亞洲劇迷都引頸期待，劇集更被視為今年下半年必煲新劇。
而據知，《Producer》原本被安排接檔《勇敢的家族》喺周五、周六晚上11時10分左右播出，不過考慮到該時段有tvN嘅人氣節目《花樣爺爺》喺9時45分播出，而SBS就喺10點播《叢林的法則》，為咗可以搶觀眾，KBS就不惜調換其他節目嘅播出時間，等《Producer》可以喺最好嘅時間播出。
《Producer》而家定咗喺周五、周六晚上9點15分播出，而原本喺周六嗰嗰時段播出嘅節目《演藝家中介》就被推遲到《Producer》播出後播出，而再接住播出嘅《追擊60分》就被分到周三晚11點10分先播出。為咗《Producer》搞到咁大陣象，就知KBS有幾重視套劇。
《Producer》將會喺下月8日正式首播，劇迷們都拍攝進度好關心，而今日有《Producer》嘅工作人員就爆料話金秀賢同IU係咁多演員中最努力嘅兩位。
工作人員話：「喺進行第一次讀劇本時，金秀賢同IU就已經背熟晒所有對白，令大家都好佩服，而金秀賢貴為韓流明星，仲一啲明星架子都冇，一直好專心咁拍戲，對其他演員同工作人員仲好有禮貌。」
另外，孔孝真今日喺Instagram上載咗兩張新照，並留言向粉絲打招呼：「你好，馬上見面吧。」只見兩張相都喺佢展示燦爛嘅笑容，又大擺托腮嘅可愛樣，粉絲都大讚佢好漂亮。
http://hk.apple.nextmedia.com/enews/realtime/20150409/53616839
