P E T E R 黃 興 桂 : 超 級 雙 料 娛 樂 邊 度 搵 ! 和 + 細 最 好 路
超級雙料娛樂邊度搵!
文： 黃興桂 23/03/2008
當今最受歡迎足球賽事，首位必定係英超，緊隨其後係歐聯，呢兩項賽事最成功之處，係包裝好，因此容易吸引全球球迷眼光，繼而能夠爭取天價電視轉播合約，知名好領隊同球員都選擇去英超搵食，提升整個聯賽水準，亦係今屆歐聯八強，英超球隊佔半璧江山原因。
和+細最好路
英超本身比賽時間已經晒亞洲球迷，會方安排賽程亦好有心思，今晚編排四大豪門同一日對決，留番呢兩場雷霆萬鈞大戰做主角，「雙料娛樂」先後上演，足以搶晒整晚收視，更加凸顯英超叫座力。其他球隊未能得此厚待，只有怪自己唔爭氣。
講番今晚兩場重頭戲，曼聯對利物浦，車路士鬥阿仙奴，Peter認為兩場波好大機會打和同開入球細。頭場「雙紅會」紅魔鬼雖然有主場之利，但紅軍實力亦好強，尤其係去到奧脫福，都想壞曼聯大事，就如早前熱刺逼和車路士一樣，曼聯冇咁易過到關。
同樣佔主場之利車路士，情況就更加曳，領隊格蘭有幾多料子，已經畀人睇穿，車仔每逢大戰，總會暴露出格蘭排陣同調動失誤，搞到隊內氣氛好差，Peter之前亦講過車仔今季表面上有得爭，但好難捧盃。至於阿仙奴方面，依近期所見，法比加斯同艾迪巴約水準有所下跌，陣中亦冇獨當一面大將壓陣，全靠整體戰同以狀態取勝，不過兵工廠近排唔多弗，要作客贏車仔，亦比較難。
觀賞角度大不同
作為球迷，呢兩場大戰，觀看角度亦唔同，「雙紅會」係欣賞曼聯「2R」朗尼及C朗，同利物浦謝拉特及費蘭度托利斯，四大頂級球星交手。至於車、阿之戰，「伯樂」雲格與冇料領隊格蘭對碰，留意格蘭能否趁此機會翻身。
今晚場波一定開大 而且桂神幫曼聯
朗尼c朗謝拉特托里斯將會invisible
