好啦!好啦!世界杯已經嚟到四強啦!呢個時候，「世界杯」已經變成「歐洲國家杯」，四強分子分別為主辦國「日耳曼」德國、「Pizza國」意大利、「法蘭西多士」法國以及「葡國雞」葡萄牙。
綜合分組賽至八強，有人歡喜有人愁、有人開心有人失落、有人一額汗有人耿耿於懷。烏克蘭、安哥拉、多哥首次參加都「係咁啦」；瑞士零失球都要出局。英格蘭贏厄瓜多爾贏到一額汗，一額汗係佢，耿耿於懷都係佢，英葡八強大戰，球迷肯定鬧死球證。
呢場比賽嘅球證係阿根廷籍，英國同阿根廷有幾大仇口唔使講，陰謀論可以話球證點吹係心中有數。下半場華倫迪禁區手球冇吹，慢鏡睇番華倫迪唔係ball-hand係hand-ball，英格蘭陰公；陰公嘅事仲要接二連三，華倫迪呢名葡國左後衛喺加時禁區明明剷跌艾朗列朗又冇吹，結果英格蘭最後射輸12碼。呢個球證成場波做得最啱嘅係將推人嘅朗尼趕出場，不過如果佢有吹卡維奴犯規在先又點會咁...
講開球證，點可以唔提普爾。呢個英國籍有幾犀利。先喺南韓對多哥場波趕多哥後衛阿路巴出場時，將紅牌同黃牌拔出嘅次序調轉，實在令我發笑；呢樣都未算，佢最勁嘅係前無古人，後無來者嘅「三黃一紅」：克羅地亞嘅施蒙歷明明有黃牌在身，跟手仲兩黃，點知普爾先生mark咗澳洲嘅摩亞，結果點?施蒙歷喺完場同普爾爭執時再領一黃，一個人一場波合共攞三張黃牌。好彩最後摩亞冇再攞牌，澳洲最後贏波，如果唔係你都唔知點好。不過一個人犯錯都總會有下場，咁普爾嘅下場係乜?咪自動執包袱返英國囉，仲要連累埋兩個分別英籍同美籍嘅旁證冇得撈，認真係累人累己!
睇咁多場波，球證嘅執法認真唔掂，好似紅牌破紀錄嘅十六強葡萄牙對荷蘭咁。係，每張黃牌都係俾得好合情合理，有根有據；不過當迪高剷跌希寧加後嘅衝突，球證嘅水準真係好唔掂，球證明知球員咁燥，應該叫兩隊隊長過嚟，同佢哋講：叫你班隊友保持克制，如果唔係就唔客氣!不過球證冇咁做，結果被批評。
有時候，球證俾牌真係唔得，好似英格蘭對瑞典場波咁。當祖高爾大腳飛身解圍時，撞落衝上嚟嘅倫格保度，而倫格保就黃牌，不過倫格保當時只係得跑，其他乜動作都冇，只係祖高爾撞落去，結果無端端食死貓。
今屆嘅世界杯球證認真唔得，令比賽失色不少，亦令球迷睇波睇到眼火爆，只係希望國際足協識得檢討啦!
–hk20020062 06.7.2
[ 本文被hk20020062在2006-07-02 16:38重新編輯 ]
