曼聯同車仔聯賽形勢，現在絕對係大眾球迷希望既情況。
講真一句早年曼聯獨大時冠軍競爭性減低真係無咁刺激好睇，而近兩年車仔聯賽獨大情況更嚴重。
當然對球隊支持者來講絕對唔會介意所支持既球隊獨大，最好長勝長有場場大勝。
在我個人睇法而言，有一支球隊獨大只係其他球隊跟唔上榜首既步伐而落後。
一些球迷希望獨大既球隊輸而拉近距離咁消極，不如希望支持既球隊跟上步伐更迫上獨大球隊而施壓。
無理由想人地退步來就自己而唔係想自己進步提升去緊迫人地。
在我而言我更會去欣賞榜首球隊既實力同穩定性。
所以現時我好欣賞曼聯同車路士既互不相讓，你3分我必須3分。
相信車仔幾經辛苦都叫緊緊跟上曼聯步伐，要明白曼聯近況好到不得了。
當然作為車迷既我對車仔失利而跌落第二係有一些唔開心，但我亦高興曼聯連勝車仔都一直給予到壓力。
以一個持平既心態睇，講到對未來形勢既睇法我對車路士感樂觀，反而對曼聯可否保持一整季而有點保留。
車路士既穩定性有幾強相信近兩季已經表現出來，雖然現在因失分只能排第二，但睇來其實未必係球隊出現大問題，問題只在於曼聯太好先會出現咁既情況，其實車仔依然保持到穩定性，另外由摩連奴上任後至今都有一個極好既現象，無論球隊失利和波甚至輸波，佢地都可以極快回復反彈，而唔會有一個保持一段時間既低潮，咁當然同後備力量有關。(要記住係後備質數而唔係後備人數)
相反曼聯依個勢係好到不能再好，但球隊可唔可能一直保持不失呢？
強如上兩季破晒英超聯賽最高分數既車仔都無能力不失分，甚至過百分奪標都做唔到， 而曼聯會唔會一個失手而有低潮期呢？
曼聯今年人腳同上年人腳相差極細，默契當然好左，但代表佢地今季既穩定性同上季分野大得可怕，只係同一班人點解分別咁大呢？
有無可能順起上來勢如破竹，但同一班人一經歷失利，穩定性同低潮期會否回復上季呢？
就算曼聯近況極佳，阿仙奴及利物浦亦被帶離10分以上，但車仔一直唔放鬆咁死跟，反而給予曼聯壓力更大更大，相信近年大家睇車仔都會明白只要你一有錯失甚至失利只係數場，佢地都有能力令你無法反勝。
最後最大問題就係曼聯現時有少許食老本，多名老將今季都光芒四射，如加利尼維利、傑斯、史高斯和蘇斯克查，當中傑斯、史高斯及加利尼維利更係助球隊取勝既重員，佢地有既經驗同技術可以幫到球隊好多，可惜另一問題係佢地年紀已大，現在只係15場，佢地可以光芒四射到第幾場呢？ 如果失去左佢地既支持曼聯穩定性會否有影響呢？
加上後備力量一般，一旦佢地體力下跌狀態回落，有邊個代替到佢地既作用？
如傑斯至今表現極佳，但環顧後備有邊個可以替佢？
當然以曼聯實力都絕對有能力保持及奪標啦，只係曼聯有可能變化既機會較大。
以上都係未知之數，不過事實數據同形勢，出問題既機會好似曼聯比車仔更大。
講到尾如果曼聯可以保持穩定性到季尾甚至奪標，我會欣賞佢地。
