求驗客手記：弟婦同約基有路
傑斯老襟夠踢 5人賽
2011年06月10日
連自己弟婦娜塔莎都唔放過嘅曼聯球星傑斯，被封為英超「賤男」，但其實係儍仔至真。事關據報佢原來起碼仲有 3個襟兄弟，而且清一色都係佢嘅紅魔前隊友。娜塔莎呢隊曼聯 5人足球隊，唔知幾時有機會一齊踢番場友誼波呢？
英國《鏡報》禮拜二爆料，話偷嗒弟婦娜塔莎後，再搞前威爾斯小姐托馬絲嘅傑斯，做咗懵仔都唔知，事關原來娜塔莎亦同佢合作過 100場波、攞過 3次英超嘅前紅魔隊友有一手。消息傳出之後，啲人議論紛紛，齊齊估吓係邊個，搞到連基斯坦奴朗拿度亦榜上有名。到咗禮拜三終於有答案啦，就係幫曼聯喺 99年成為 3冠王嘅約基，不過唔止佢一個，仲有兩名曼聯棄將丹尼森遜同埋巴士利。連埋傑斯兩兄弟，娜塔莎真係儲夠人，組成一支紅魔「襟兄弟」 5人足球隊。
自爆成日同約基瞓
娜塔莎同啲朋友講，早喺 99年就認識現年 39歲、經已退休嘅約基，仲喺對方為曼聯效力 4季其間，成日同佢瞓。至於現時分別效力紐卡素同埋新特蘭嘅丹尼森遜及巴士利，亦同娜塔莎有一手。據知情人士同英國《太陽報》講：「娜塔莎喺球壇好出名，好多球員都好嗒佢糖，或者佢嘅性格好啱班球員啲口味啩。」但被拖落水嘅丹尼森遜、巴士利同埋約基，好似傑斯咁冇作出任何回應。
巴士利丹尼森遜都有份
約基出名私生活唔檢點，以前喺效力阿士東維拉時就約埋澳洲門將保斯尼治玩 3P。至於巴士利好耐之前代表曼聯嚟香港比賽，曾經喺夜店鹹豬手本港女藝人陳煒，單嘢仲上埋娛樂版，真係好人極有限。所以佢哋兩個真係有可能同娜塔莎有路。至於丹尼森遜，或者佢貪過癮，又可能想借助對方係傑斯弟婦嘅關係，博喺曼聯上位啩！
傑斯勾弟嫂呢單桃色新聞越搞越大，仲日日新鮮日日金。可能隔多一日，英國傳媒又挖到料，同娜塔莎有路嘅仲有其他紅魔隊友，到時分分鐘由 5人足球隊變做 11人足球隊都未定。
http://hk.apple.nextmedia.com/template/apple/art_main.php?iss_id=20110610&sec_id=25391&subsec_id=6041&art_id=15328847&cat_id=5026026&coln_id=5028941
