http://news.hkheadline.com/dailynews/headline_news_detail_columnist.asp?id=190973§ion_name=wtt&kw=0Executive日記——
同紅魔傾唔掂數 曼聯吧執笠
2012-05-16
曼聯輸波,紅魔鬼球迷傷心欲絕,嚟緊仲要迎接另一個傷痛,就係本港開業兩年嘅「曼聯吧」將會喺禮拜日(二十日)結業。呢間主題餐廳同曼聯球會簽兩年約,雙方續約條款談不攏,無奈結業。餐廳公關話,消息傳出後,過去三個禮拜坐無虛席,晚晚爆棚,好多精品、波衫大減價,粉絲一掃而空,所剩無幾。
本身係足球迷嘅藝人黃婉曼話,冇咗間咁好氣氛嘅睇波餐廳好可惜,仲建議不如改為「曼城吧」,賀曼城勇奪英超聯冠軍咁話! 位於尖沙咀樂道嘅曼聯主題餐廳,二○一○年五月開幕,當時有超級紅魔鬼擁躉李克勤捧場。據餐廳所屬嘅力士達飲食集團話,之前同曼聯球會嘅合約只係兩年,因雙方就新合約傾唔埋,冇再續約,但公關否認同經營權太貴有關。佢仲話,開業後,一直反應唔錯,尤其一有曼聯賽事,二百幾個位必定坐無虛席。上周五,佢哋仲舉行咗個farewellshow,有LiveBand演唱,向曼聯迷告別,之後舖位會轉營西餐廳。
黃婉曼盼變「曼城吧」
唔
少紅魔鬼粉絲喺網上話唔捨得,少咗個聚腳睇波飲嘢地方,但亦有人話夜晚比較貴,午餐就划算啲。最近,本身係阿仙奴粉絲嘅黃婉曼話,佢去過呢間曼聯吧好幾次,覺得睇波氣氛特別好,吧內裝飾以紅黑為主,夠晒型,結業覺得好可惜,若有時間一定會再去捧場,仲希望快啲東山再起。不過,佢話,自從見證曼城喺最後五分鐘贏波嘅永不放棄決心後,就好鍾意曼城隊波,所以如果能改成曼城加曼聯再加阿仙奴主題餐廳,就更好喎。