今晚亞冠分組賽昨晚好戲連場，編入G組嘅中超班霸廣州恒大(足智彩譯:FC廣州)衞冕第一擊幾乎落筆打三更，好彩有新援迪亞文迪梅開二度，
帶領球隊於主場以4比2反勝澳職嘅墨爾本勝利，有驚無險打響頭炮。
恒大今仗派出貴價新援迪亞文迪，拍住穆里奇同艾傑臣攻堅，不過上半場反被客軍嘅柏保路干查拉斯及布洛斯咸偷襲得手，
易邊後恒大主帥納比兵行險著變陣343，即收到奇效，孫祥橫傳黃博文追番粒，之後意大利國腳迪亞文迪轉身起左腳抽射世界波扳平，盡顯身價，
70分鐘輪到艾傑臣接應長傳心口一控快射反超前，完場前迪亞文迪舞龍咁舞射成4比2，個人省2粒好威水。
同組嘅南韓勁旅全北汽車喺主場以3比0大勝日職盟主橫濱水手。至於另一支中超球隊貴州人和(足智彩譯:FC貴州)就冇恒大咁好彩，喺H組首輪作客以0比1不敵日職嘅川崎前鋒。
迪亞文迪
[ 此帖被羅力亞在2014-02-26 22:37重新編輯 ]
