Ａ 組形勢：
巴西 ４ ＋２
墨西哥 ４ ＋１
克羅地亞 ３ ＋２
喀麥隆 ０ －５
Ａ組雖然牌面好似爭得好緊要咁。但其實巴西個首名都應該幾穩陣。巴西雖然表現未如理想（可能係我地球迷要求高掛），但暫時仍然係咁多隊傳統勁旅中表現比較穩定既一隊。以積分４分，得失球＋２排頭位。而且，巴西尾場只需要對住首兩仗零入球兼慘吞五蛋既喀麥隆，斷估都唔會再出現德國對加納或阿根廷對伊朗呢類爆冷戰果囉掛。今場只要小勝喀麥隆１，２球，將得失球差擴大到３，４ 球。咁就算墨西哥淨勝克羅地亞兩球，都搶唔到巴西個首名。
何況，我買克羅地亞羸。墨西哥上仗雖然迫和巴西，但功在守門員。全隊表現最多只可以話不過不失。未見有咩特出或過人之處。相反，克羅地亞首仗雖敗於巴西腳下，但個別球員表現搶鏡。整體配合有陣形，有默契！何況，鋒線主力文迪穌傑第二仗復出後，整隊攻力大增（可惜呢場我無睇）！即送喀麥隆4蛋！尾場對住墨西哥，我相信克羅地亞有力小勝。
當然，亦有可能喀麥隆淨勝巴西兩球！然後墨、克兩隊和波，雙雙出線都未定架。不過到時世界杯恐怕因為全國暴動而被迫腰斬了。
Ｂ組形勢：
荷蘭 6 +5
智利 6 +4
澳洲 0 -3
西班牙 0 -6
B 組形勢簡單之中見變數。簡單係，有兩隊已經篤定出線了。但變數係，最後先可以決定到邊隊首名。而且，荷蘭同智利似乎未見邊隊特別佔優。往績同名氣，當然係荷蘭大大領先。但今屆大家都見到，美洲球隊似乎佔盡地利。一加一減下，呢場勝負難料。由於大家都唔想係16強面對巴西，相信都會全力爭取首名。呢場應該好睇吧。個人雖然較為睇好荷蘭 1 線 ，但其實潛在隱憂都幾大。尤其荷蘭既攻力雖強，但防守似乎欠佳。智利一心搏槌既話，可能真係可以偷雞成功。
[ 此帖被freezefox在2014-06-23 17:04重新編輯 ]
