韓國少女時代前成員Jessica今日再度現身香港，現身銅鑼灣出席化妝品 牌活動，吸引過百名粉絲現身撐場。
今日Jessica雖然無騷腿，不過就着咗件白色透視衫大透黑色bra，非常性感。
當主持問Jessica覺得自己最性感係咩時候時，佢話：「沖完涼後。」立即引起全場粉絲尖叫，不停大叫「sexy!」
Jessica先喺台上示範用Google Glass化唇妝，之後就匆匆離場，現身不足十分鐘。不過粉絲依然反應熱烈，不時用韓文大叫「靚女」、「女神」。
Jessica之後接受傳媒訪問，提到已經多次來港，佢表示：「我愛係香港。」
有記者問到少時成員Yuri今日都喺香港，Jessica反應驚訝問：「真係？我唔知道。」問到會唔會見吓，佢先答：「我唔知道。」當記者追問二人完咗活動之後會唔會打算約見面，佢今次答：「我唔認為。」同場嘅丁子高話Jessica已經同所屬嘅事務所SM已完咗約。問到未來工作有咩新動向，Jessica話物色緊唔同嘅工作，電影同劇都有睇緊。佢又話因為同謝霆鋒係朋友，所以都想同對方合作。
問到會唔會介意拍感情親密戲，佢話唔介意，因為做演員無得計較呢啲。當問到怕唔怕男朋友介意時，佢竟答記者:「我怕你妒忌多啲。」
Jessica又話噚晚去咗睇楊千嬅演唱會，今次係佢第一次睇香港歌手嘅騷，佢大讚千嬅啲衫好靚同啲歌好感人，又話之後有去後台搵千嬅傾計，都希望日後二人可以合作。
最後，Jessica透露佢都有計劃同香港或內地導演合作，不過問到係邊個時，佢話：「呢個係一個小秘密。」
當完成訪問後，Jessica突然走向粉絲堆同粉絲合照，又不時扮鬼臉，全程極親民。
