迪神:又攪喊人[表情]
[圖片]
(2015-02-05 23:58) 
秀英快閃活動五分鐘
粉絲唱生日歌
韓國女團少女時代成員秀英今日下晝現身將軍澳，出席香港Colourmix舉行嘅代言活動，吸引近二百名粉絲到場支持。
活動原定喺下晝三點十五分開始，不過秀英就遲咗成半個鐘先現身，好在一班粉絲都冇發牢騷，仲仍然好熱情咁大叫歡樂，令秀英好開心。
以一條黃色橫間貼身裙現嘅秀英就用廣東話同大家打招呼，又用英文「I Love Hong Kong」、「I Miss You Guys」等甜言嚟冧粉絲，親民到極。問到對香港粉絲印象如何時，秀英就話：「今次係我第一次自己嚟香港出活動，事前都好緊張，不過之前嚟香港開演唱會時都接觸過香港粉絲，個個都好熱情，所以亦都好似見朋友、屋企人一樣，好開心。」
另外，適逢下周二係秀英二十五歲生日，台下粉絲就即席唱咗英文版同韓文版嘅生日歌畀秀英聽，同佢提前慶生，而秀英亦都表現得好驚訝，仲向粉絲送上飛吻回報。
不過，成個問答環節連埋唱生日歌同影相，秀英只係喺台上逗留咗唔夠五分鐘就落咗台，令粉絲有少少唔夠喉囉。
完成台上環節之後，十多分鐘後秀英就再出返嚟做個長少少嘅訪問，回答大會Colourmix一早set好嘅問題。
適逢農曆新年將近，秀英被問到會唔會同屋企人去旅行過節時，秀英就話會，但仲未諗到去邊，不過一定會衝出韓國，仲話好期待同屋企人有個開心時光。
問到會點樣慶生時，秀英就笑笑口咁話：「生日當日應該會喺紐約，可能會同成員提前開派對慶祝。」問到會想收咩做生日禮物時，秀英就話之前好想收到襪，之後粉絲就送咗好多好多畀佢，而今次佢就睇中咗一部好得意嘅相機，希望可以嗰部相機影好多靚相，再收錄喺少女時代下張新專輯入面。
當然，嚟緊下個星期六就係情人節，講到呢個話題秀英就未有透露會唔會，同埋會點同男友鄭京浩過，不過佢就話想以最靚嘅一面見男友，所以事前一定會用好嘅護膚品做好護膚同化妝，兜個大圈幫品 牌賣廣告。
http://hk.apple.nextmedia.com/enews/realtime/20150205/53408328
