2:1挫南華捧足總盃 傑志膺3冠王 
傑志成為三冠王，兼令南華再次四大皆空！周日喺旺角場上演足總盃決賽，傑志憑林志堅同辛祖上、下半場各入一粒，以2:1擊敗有朱兆基建功南華，繼高級組銀牌同聯賽後再奪錦標，成為今季港超大贏家！
足總盃係今個港超球季最後一個錦標，雙方喺5,038名球迷面前強陣出擊，傑志前線繼續由獲選為4、5月最佳球員辛祖掛帥，夥拍費蘭度、林恩許等攻堅，南華就由高美斯、加藤友介同麥高派路域爭取入球。雙方開波初段表現拉鋸，戰至29分鐘，費蘭度左路地波傳畀禁區頂林志堅，後者無人看管下妙射近柱入網，為傑志領先1:0。南華其後有扳平機會，但39分鐘加藤友介頭槌跣向遠柱，朱兆基近門抽射高出，南華半場落後一球。
換邊後傑志一開波就有收穫，入替林志堅唐建文右路傳中，費蘭度左路地波「修正」，辛祖輕輕一扣就呃過幾位南華守衛，再睇定射近柱入，傑志領先2:0！南華落後兩球下換入謝家強、艾華同羅曉聰加強攻力，先有陳偉豪接應角球頭槌攻門，眼看必入之際俾傑志門將郭劍橋飛身撲出，但68分鐘終於收效，艾華右路壓落底線傳中，朱兆基頭槌破網，為「少林寺」追番1:2！可惜佢哋未能乘勝追擊，末段連番被吹罰下未能製造有威脅埋門，最終再失一盃，宣告今季四大皆空。
http://hk.apple.nextmedia.com/realtime/sports/20170514/56692285 [ 此帖被羅力亞在2017-05-14 18:08重新編輯 ]
