其實下季曼聯個形勢唔會比今季好，只會比今季更惡劣。
先講對手。曼城成隊波都處於成熟階段，運作順暢。你都幾乎可以肯定，季尾佢地會繼續買人彌補弱點。上季後防補強效果已經立竿見影。籠門升左幾級，兩閘完全兩個級數。只係文迪傷左影響左少少。來季文迪傷癒，又有戴夫做後援。分分鐘佢再買多一個閘黎做替補都仲得。但估計曼城會先考慮中堅既人選。公司漸老，石頭未成大器，另一件奧達文迪就錯漏百出。你話比曼城攪掂埋個中堅位，再加強防中替補，下季你想同佢鬥，只會比今季更難。
利記走左古天奴，影響遠遠比想象中少。沙拿既爆發未必可以持續到下一季。但三叉既進攻套路卻漸見成熟。OX 漸漸融入球隊，打到中場中既角色。下季基達來投既話，中場既活力更加進一步加強。季尾隨住雲迪克既加盟，K1既進步，羅拔臣取代摩蘭奴，防守能力亦漸漸轉好。AA 作為替工，第一季表現絕對合格。如果佢再成熟D ，下季隨時係最佳英超右閘之一，我話既。如果來季可以再買多件中堅做替補，又或者再加強中前場既後備力量。利記表現穩定既話，絕對係三甲人選之一。有力同曼城爭一日長短。
熱刺出奇地，全季無咩見到嚴重既傷兵問題。係兵源奇缺，賽事頻密既情況下，長時間保持穩定狀態！簡尼、大力臣、阿里全季表現水準以上。SON 直頭係一路奇兵。今季只要唔好比人掘走D 重要球員，適當地係中堅、前鋒等位稍稍加強替補（其實之前已經做左，我好相信黎緊下季就有料到，比到球迷驚喜）。熱刺已經唔係李斯特城個類，靠一鼓作氣打一季好波既球隊。只要普捷天奴唔走，熱刺絕對有可能繼續維持強勢。成為倫敦一哥，殺敗車仔同阿仙奴，隱佔四強席位。
以上三隊，你都可以好清楚睇到佢地今季既弱點，亦都好清楚睇到球會已經針對自己既弱點慢慢部署，進行改善。亦都可以預期下季球隊既方針同買賣人政策大概係點。因為個大框框已經成形，宜家係進入執漏既工序。今年既曼聯，對住以上三隊，都難言「必勝」。唔係講已經知道既對賽結果，係講賽前，球隊有冇把握壓住強手，取得勝利。以往，曼聯對熱刺，即使唔係易食，但最後多數都係取得勝利。但今季，下季……仲有冇呢支歌仔唱？都唔好講，曼城，未打就個個先認輸了（包括球迷）。其實呢個係信心問題，而信心係建立於往績。唔係講幾年前既往績，係講當季既表現。個一季，你打得好唔好，球迷其實心裏有數。唔講出口吧了。一對強隊就淆底，你話隊波可以有幾好？
曼聯最大既問題係，你都唔知個問題係邊，都唔知應該從何入手改善。如果比摩佬，一野過又換佢五六名主力，清算半隊波，你又要等唔知一季定兩季隊波先磨合完成了。但要講以邊個為重心去重建成隊波，你又講唔出。好膚淺咁睇，一定係以普巴為核心，以其他球員去配合佢，慢慢重建隊波。但好明顯，摩佬唔想亦唔會咁做。買入山齊士，宜家諗番，真係有少少搵舊石頭掟自己隻腳咁款。山齊山加盟後，完全唔覺得有加強球隊實力，反而拖累到球隊變三不象。重心更加唔明顯。兩閘老化日催嚴重，但連替補既人你都要趕走。中堅時好時壞，不能依賴。曼佬今季幫到曼聯既，就只係買入馬迪，令防中位置有一個較可靠既人選吧了。唔會再夾硬迫HEHE 打一個佢根本唔應該打既位。
曼聯以上種種問題，你期望摩佬下季會解決哂？其實，佢唔係無能力解決，但個人感覺，佢會嫌麻煩，唔會花時間逐個球員逐個位去執，寧願推倒重來。一野清洗一半人，再買一大班人番黎又試過………然後又要等下一季。
[ 此帖被freezefox在2018-04-17 10:37重新編輯 ]
