【《正義迴廊》破2600萬票房回本 麥沛東12.17結婚 向未婚妻承諾：我會努力工作，解決佢既擔憂，令佢自豪】
《正義迴廊》上映接近一個月，截到前日 (22/11) 為止，票房已經衝破2600萬，之前監製翁子光話票房過2000萬多少少就可以回本，相信依家同各投資者都有交代。而電影上畫後，全片演員被讚演繹出色，特別係兩位主角楊偉倫及麥沛東，被網民一致睇好有力競逐明年金像獎，麥沛東更於早前贏得第46屆香港國際電影節「新秀電影競賽(華語)」最佳男演員獎項。
現年33歲既麥沛東，畢業於香港演藝學院戲劇學院，獲頒藝術學士（榮譽）學位，主修表演；2014年正式加入劇團成為演員，默默奮鬥8年，到遇上《正義迴廊》既「唐文奇」，終於令佢既演技獲得肯定，人氣暴升，同時佢亦會喺下月17號同拍拖5年女友Sherraine拉埋天窗，好事成雙。麥沛東其實喺舊年自己11月生日時，特別安排同女友去酒店staycation，一到12點就向女友求婚，當時大家都感動到喊，但因為疫情關係，所以延到下月先舉行婚禮。
「在對的時間遇上對的人」，就係麥沛東想結婚既原因。麥沛東同女友喺5年相處中，經歷高低起跌，佢好感激女友陪伴：「當你心情低落既時候，佢會聽你傾訴，當你開心時候，佢會同你分享喜悅。互相欣賞，互相進步。」對Sherraine會有何承諾？麥沛東說：「我對佢既承諾就係我會努力工作，解決佢既擔憂，令佢自豪，彼此成為更好的自己。」
祝福一對新人白頭到老，永遠幸福。
[ 此帖被羅力亞在2022-11-24 21:35重新編輯 ]
