有冇呢類經歷？
開始既時候，犯左一個小錯！但因為實在太小了，根本連算唔算真係「錯」都好難講得準。所以，你會選擇繼續。因為你相信自己既判斷，亦相信事情終會走回你預設的路軋上。
當然，事情既發展，往往係相反。
更多既證據證明，你真係錯！但因為都已經過左一段時間，你投放係到既資源愈黎愈多。包括你既時間啦，心血啦，金錢啦……最重要，最重要，你既信念。承認錯誤未必真係咁難，要斷絕之前所投放既一切先係痛苦！你會「理智地」同自己分析，其實都未必真係完全百分百肯定錯哂既，仲有轉機！仲有機會！萬一宜家放棄，咪咩都無哂？萬一轉個頭件事真係如你所料，你一早放棄都話者，堅持都最尾，臨食糊個下先放棄，咪仲on 車？
所以你說服自己堅持落去。
當然，故事既發展，大家都估計到………
基本上，除非你係傻既。否則，到一日，唔駛人講，你自己都心知肚明：「哎！我錯啦！」。但偏偏，個一刻已經無人會再講你。因為要講既，之前一早講哂。佢地無你咁好耐性。晨早已經放棄。呢一刻，要輸既野都棄得七七八八。十成既本錢（例如資金）得番一、兩成。你會開始自暴自棄，車！反正都輸左八成幾九成，我都唔爭在輸埋個一兩成。咪繼續由佢擺係到囉。從來無諗過，個一兩成即使係幾少，極有可能係你將來翻身既最後本錢。呢一刻，你失去既已經唔係金錢、時間、心血。呢d 都係可以計數既。你失去既，係信念。
係呢個時間，理智只會帶來痛苦。你愈理智，你愈痛苦。你會亳不考慮地，全盤放棄理智。有人會進入病態既行徑。有人會全憑感性感覺去處事。有人會卜天問神。總之，過得一日得一日。唔好問我聽日，因為要我諗聽日，即係要我計劃。計劃係智理既，唔適合宜家既我。逃避，將本來可能仍然有機會挽救既問題，變成無可挽救，最後變成悲劇既結局。
將你以前某d 既經歷：買股票呀；等一個女人呀；甚至係玩yahoo game都好，放入頭先既模式到，睇下自己有冇都曾經鬼迷心竅或差ｄ 鬼迷心竅。
[ 本文被freezefox在2007-04-23 11:04重新編輯 ]
