苦等六年，終在兩年前有機會回歸香港樂壇的孫耀威，一心要收復失地，卻在近日因聲帶嚴重出血，被醫生下令不能再唱，歌唱事業即時玩完。但禍不單行，上星期他在照 X光時又發現鼻生粉瘤，必須盡快做手術切除，否則鼻瘤隨時異變。受到雙重打擊的孫耀威，有傳近日情緒極度低落，向教友哭訴。
健康亮紅燈，據知孫耀威於本周六（ 12日）完成「星光熠熠耀保良」騷後，將被逼退出樂壇。
原本 10月出唱片的孫耀威，上月忽然向所屬的環球唱片公司以聲帶不適為由，要求無限期押後錄音，且一連串的登台亦推掉，有別他向來搏殺態度。忽然放軟手腳，原來聲帶出事。據知半年前，孫耀威發現每次唱歌演出後喉嚨便出現劇痛和紅腫。起初以為是一般歌手常有的聲帶發炎，於是便戒酒救聲，但一直沒有好轉，直至最近才被醫生證實是聲帶出血，故每次唱歌，聲帶的微絲血管都會爆裂，導致喉嚨充血。醫生即勸喻他要放棄唱歌保住把聲，否則有永久失聲危機。頓失謀生工具，孫耀威起初還不敢向環球交代自己病情，心情低落時，惟有返教會向幾個教友歌手哭訴。
聲帶出血將雄心壯志的孫耀威陣腳打亂，他原本計劃明年在台灣出碟，如今都因病泡湯。為了讓聲帶休養，本周六頂硬上做埋「星光熠熠耀保良」慈善騷，便向外宣布退出樂壇。
為了醫病，孫耀威除了中西合璧外，更向好友李克勤求救。知情者透露：「幾年前容祖兒唱唔到歌，要去南京針灸成個月，幫佢救番把聲嘅中醫師，就係李克勤介紹俾容祖兒，所以如果香港嘅醫生醫唔好， Eric（孫耀威）就去南京醫，依家 Eric就喺香港做針灸。」記者在他的 blog中發現一張他正接受針灸治療的相，相中他由頭到喉嚨都插滿針。孫還在 blog中呼籲一班朋友及 fans為他的病情祈禱，顯得非常憂慮。
半月後割鼻瘤
孫耀威弄得如斯田地，除了一直過分搏殺唔錫聲，另一導火線，是他跟很多歌手一樣，為快速消炎開聲，選擇經常打類固醇。知情者透露：「孫耀威每月平均做二十幾場騷，無論係有錢收嘅騷，抑或電台人情騷佢統統都接，名副其實工作狂，結果唱到聲帶勞損發炎，又長期服用類固醇，最終搞到聲帶出血。最慘嘅係，近日醫生再驗到佢個鼻有粉瘤，要盡快做手術切除。醫生話因為佢上年撞車，搞到鼻骨歪咗，壓住鼻嘅肌肉，而佢又長期服食類固醇，影響咗免疫力，所以鼻黏膜容易感染細菌，成日含膿，搞到變咗粉瘤，要盡快做手術。」
雙重打擊，據知孫耀威情緒更加低落，身邊友人透露：「佢知道自己連個鼻都有事，心情差到收埋咗自己幾日，我哋一班朋友都好擔心，好在佢有信仰，好快佢用正面態度接受自己咁多問題。佢做埋手頭上工作，好似兩星期後就做鼻嘅手術。」
現階段健康要緊的孫耀威，連日來足不出戶，直至本周一（ 7日）早上十一時，他在男助手及友人陪同下，由深井寓所到紅磡一中醫館針灸，個多小時後孫耀威又到尖沙嘴睇耳鼻喉專科西醫。一日睇兩個醫生，為健康為飯碗，他心急求醫絕對可以理解。
直認退出樂壇
本周三（ 9日）記者趁孫耀威出席完九展一個活動，即上前問他病情，對此他直認不諱：「諗唔到自己一時間要面對兩個病，我係因聲帶出血無了期退出樂壇，幾時可以好番我答唔到你，因為連醫生同我都唔知。至於鼻裏面個瘤，醫生話會盡快幫我做手術，再遲怕有異變。」
他說早前心情確受打擊，幸而有信仰支持，令他漸漸以樂觀態度應付疾病纏身。「我相信否極泰來，黑暗盡頭就係光明，我做埋手頭上工作會休息幾個月，之後唱唔到歌我咪返內地拍番劇，話唔定賺得仲多，不過欠環球一張唱片就真係唔知幾時先還到。呢次病令我醒覺要珍惜健康，以前實在太唔錫身。」
歌手聲帶易出事
不少歌手都因勞損、感冒或壓力，易令聲帶發炎、生繭，甚至出血。聲帶一出事，對歌手而言尤如「死期到」，故大部分都選擇打類固醇快速制止病情，搞到聲帶問題日益嚴重，如同藏着炸彈，唔知幾時會爆。
張學友
最經典莫過於歌神張學友， 97年他曾唱到聲帶受傷，之後不斷復發。 05年他在台灣舉行「雪狼湖」音樂劇途中，因失聲唱不下去要腰斬，事後重演一場補償給歌迷。 07年在港舉行個唱，又再次失聲被逼取消最尾兩場。
容祖兒
01年飽受聲沙困擾的容祖兒，最後要飛往南京找中醫針灸救聲，因聲帶病情嚴重，人家十日療程只需每日一次，但她則要每日兩次，結果留在南京醫病半個月才復元返港。
張敬軒
據知他亦因聲帶有事，經常要靠打類固醇開聲，才能出騷唱歌。
孫耀威求診的耳鼻喉專科醫生黃雅信（圖），擅長幫人打救命針（即類固醇）開聲，故圈中半數歌手都幫襯他，客仔有張學友、容祖兒及張敬軒等。當年梅艷芳在一次個唱開騷前失聲，亦是找黃雅信打救聲針解圍。但西醫林志源稱，使用過多類固醇，會導致骨質疏鬆、糖尿及影響免疫力，故類固醇雖能快速消炎，但不鼓勵病人長期使用。
